مہاراشٹر میں 40,000ڈاکٹر ہڑتال پر
ممبئی، 17 جون(ایس او نیوز/آئی این ایس انڈیا) مہاراشٹر میں 40,000سے زائد ڈاکٹروں نے مغربی بنگال میں ڈاکٹروں کی حمایت میں آئی ایم اے کے ذریعہ بند کی حمایت کرتے ہوئے پیر کو کام کا بائیکاٹ کیا۔ایک افسر نے یہ معلومات دی۔انہوں نے کہا کہ ریاست کے مختلف سرکاری اور نجی اسپتالوں کے ڈاکٹر بنیادی طور پر اوپی ڈی (بیرونی مریض کے سیکشن) اور دیگر صحت کی خدمات کا بائیکاٹ کر رہے ہیں۔ اس سے پہلے، بھارتی طبی تنظیم (آئی ایم اے) نے مغربی بنگال میں حال ہی میں ڈاکٹروں پر حملے کے پیش نظر ملک بھر میں پیر کو ہڑتال کرنے کا اعلان کیا تھا۔آئی ایم اے کے ایک افسر نے بتایا کہ مہاراشٹر میں 40,000سے زائدڈاکٹروں اور دیگر اطباء نے مغربی بنگال میں اپنے ساتھیوں کی حمایت کرنے کا فیصلہ کیا ہے جو اپنے وزیر اعلی ممتا بنرجی کے خلاف احتجاج کر رہے ہیں۔انہوں نے بتایا کہ حالانکہ ایمرجنسی خدمات متاثر نہیں ہوں گی اور پہلے سے ہی اسپتال میں داخل مریضوں کو تمام ضروری ادویات مہیا کرائی جائیں گی۔آئی ایم اے مہاراشٹر کے سکریٹری ڈاکٹر سہاس پنگلے نے بتایاکہ ہڑتال کی حمایت میں مختلف اسپتالوں میں اوپی ڈی خدمات کو بند کر دیا گیا ہے۔کولکاتہ کے این آر ایس میڈیکل کالج اور اسپتال میں دو ڈاکٹروں پر حملے کے واقعہ کے بعد سے مغربی بنگال میں ڈاکٹر 11 جون سے ہڑتال پر ہیں۔