کاروار: بس کا ٹکٹ کرایہ 33روپے ۔ساتھ میں موجود کتے پر لگا 400 روپے جرمانہ !
کاروار 26؍دسمبر ( ایس او نیوز) کے ایس آر ٹی سی کے قوانین کے مطابق بسوں میں سفر کے لئے جس فاصلے کا کرایہ 33روپے ہے اسی فاصلے کے لئے ساتھ میں کتا موجود ہوتوٹکٹ نہ لینے پر 400روپے جرمانہ بن جاتا ہے۔
ایسا ہی واقعہ کاروار تعلقہ کے آمدلّی علاقے میں پیش آیا جب ایک مسافر نے اپنے پالتو کتے کا ٹکٹ خریدے بغیر بس میں سفر کرنے کی کوشش کی۔ جب بھٹکل ڈپو کی بس گوا کے مڈگاؤں سے بھٹکل کی طرف آرہی تھی تو انکولہ کا ایک شخص کاروار بس اسٹانڈ سے اس میں سوار ہوگیا۔ اس نے اپنا ٹکٹ تو لے لیا مگر اپنے پالتو کتے کا ٹکٹ نہیں خریدا۔
اس دوران آمدلّی کے پاس ٹکٹ چیکنگ اسکواڈ کے افسران بس میں سوار ہوگئے اور جب کتے کو بغیر ٹکٹ بس میں سفر کرتے ہوئے پایا تو قانون کے مطابق ا س پر 400روپے جرمانہ لگادیا۔ افسران نے مسافروں کوبتایا کہ چوپایے جانوروں کے لئے بس میں سفر کرنا ہوتو پورا ٹکٹ لینا ہوتا ہے اور اگر جانور دو پاؤں والا ہو (مرغی ، پرندے وغیرہ) تو آدھا ٹکٹ خریدنا ضروری ہے۔
اس طرح کاروار سے انکولہ تک کا سفر جو 33روپوں میں ختم ہونے والاتھا ، وہ پالتو کتے کی وجہ سے چار سو روپے جرمانے کا ساتھ پوراہوا۔
