اڈپی میں فیس بک پر تین طلاق دینے والا شخص گرفتار
اڈپی11/اگست (ایس او نیوز)یہاں سے قریب شیروا نامی مقام پر ایک شخص نے فیس بک کے ذریعے اپنی بیوی کو تین طلاق دے دی جس کے بعد پولیس نے اسے گرفتار کرلیا ۔
پولیس کے بیان کے مطابق گرفتار شدہ شخص کا نام شیخ سلیم (39) ہے جو شیروا کا رہنے والا ہے۔ سلیم کی شادی 2010میں سوپناز نامی لڑکی کے ساتھ ہوئی تھی۔ ان کی ایک بیٹی بھی ہے اور وہ سب سعودی عربیہ کے شہر دمام میں مقیم تھے۔
اس پر الزام ہے کہ 3اگست کو وہ اپنی بیوی اور بیٹی کودمام سعودی عربیہ میں چھوڑ کرکسی اور خاتون کے ساتھ ممبئی فرارہوگیا۔پھر وہاں سے اس نے اپنے سمارٹ فون کے ذریعے فیس بک پروفائل پر اپنی بیوی سوپناز کو مخاطب کرتے ہوئے تین طلاق دینے والا آڈیو مسیج اپ لوڈ کردیا۔ اس پر اس کی بیوی نے دمام سے پولیس کے پاس آن لائن شکایت درج کروائی۔
شیرواپولیس نے مسلم شادی شدہ خواتین کے حقوق سے متعلق 2019کے ایکٹ کی دفعہ 4 کے تحت اس کی شکایت رجسٹر کرلی۔ پھر جب پولیس کو مصدقہ اطلاع ملی کہ سلیم شیروا میں واقع اپنے گھر آیا ہوا ہے تو اس نے وہاں پہنچ کر سلیم شیخ کو گرفتار کرلیا۔