شری گنگا نگر،8؍اکتوبر (ایس او نیوز؍یو این آئی)  راجستھان میں شری گنگا نگر اور ہنومان گڑھ اضلاع میں پولس نے 37ہزار سے زیادہ نشیلی گولیاں برآمد کرکے تین ملزمین کو گرفتارکیاہے۔پولس کے مطابق ہنومان گڑھ ضلع میں سنگریا تھانہ کے بھگت پورا گاؤں میں کل رات ملی رام بازی گر کو حراست میں لے کر اس کے قبضے سے 4850 نشیلی گولیاں اور کیپسول برآمد ہوئے ہیں۔

اسی طرح ہنومان گڑھ جنکشن پولس نے بلوندر سنگھ بازیگر کو گرفتار کیا،جس کے قبضے سے سات ہزار سے زیادہ نشیلی گولیاں برآمد ہوئی ہیں۔بلوندر سنگھ کے قبضے سے ٹراماڈول سالٹ کی 4750اور الپراجولم کی 2400گولیاں برآمد ہوئی ہیں۔وہ موٹرسائیکل پر نشیلی گولیوں کی کھیپ کہیں سپلائی کرنے جارہا تھا۔

اس دوران شری گنگا نگر میں صدر تھانہ پولس نے کل دیر شام دو افراد کو 25ہزار نشیلی گولیوں سمیت گرفتار کیا۔گرفتار شخص کی شناخت شری وجے نگر تھانہ علاقے میں چک 38جی بی کے رہنے والے رویندرسنگھ (35)اور جے دیپ کے طورپر ہوئی ہے۔

پولس نے دونوں ملزمین کو شری گنگا نگر کے نزدیک موہن پورا راستے پر پیدل جاتے ہوئے گرفتار کیا۔ان کے پاس پلاسٹک کے کٹے تھے،جن کی تلاشی لینے پر 25ہزار نشیلی گولیاں برآمد ہوئیں۔پولس نے ملزمین کے خلاف این ڈی پی ایس ایکٹ میں معاملہ درج کرکے جانچ شروع کردی ہے۔