مینگلور 25 مارچ (ایس او نیوز)   نجی مکان کے پچھلے حصے میں حفاظتی دیوار تعمیر کرنے کے دوران پہاڑی پر سے چٹان کھسک کر مزدوروں پر گرنے کے نتیجے میں تین مزدور مٹی کے اندر ہی زندہ دفن ہوگئے۔ واردات مینگلور سے قریب 85 کلو میٹر دور ضلع دکشن کنڑا کے سولیا  تعلقہ کے گرومپو  میں سنیچر دوپہر کو  پیش آئی۔

بتایا گیا ہے کہ پہاڑی کے نیچے واقع ایک مکان  کے پچھلے حصے میں فِلّر کے ذریعے حفاظتی دیوار تعمیر کرنے کا پلان تھا جس کے لئے سات مزدور سینٹیرنگ کا کام جاری تھا۔ اسی دوران اوپر پہاڑی پر سے مٹی گرنے لگی۔ خطرے کو بھانپتے ہوئے چار مزدور فورا دور بھاگنے لگے اس سے پہلے کہ دیگر مزدور کچھ سمجھ پاتے اچانک بڑی چٹان پہاڑی پر سے گرگئی جس کی زد میں تین مزدور آگئے۔

حالانکہ اطلاع پاتے ہیں فائر برگیڈ اور پولس عملہ جائے وقوع پر پہنچ گیا اورجے سی بی مشین کے ذریعے مٹی نکالنے اور مزدوروں کو بچانے کی کوششیں کی گئیں، مگر مٹی ہٹاکر تینوں دبے ہوئے مزدوروں کو باہر نکالنے تک دیڑھ گھنٹہ صرف ہوچکا تھا اور تینوں کی موت واقع ہوچکی تھی۔

تینوں مہلوکین کا تعلق گدگ کے مُنڈرگی  سے بتایا گیا ہے ۔ جن  کی شناخت  سوم شیکھر ریڈی (45)  اور اس کی اہلیہ شانتکا (35)  کی حیثیت سے کی گئی ہے ، مزید ایک کا نام معلوم نہ ہوسکا۔

پتہ چلا ہے کہ ابوبکر نامی مکان کے عقب میں حفاظتی دیوار تعمیر کرنے کا کام جاری تھا جس کے دوران پہاڑی کھسکنے کی واردات پیش آئی۔

تینوں مزدوروں کی نعشوں کو سُولیا اسپتال کے مردہ خانے میں لےجایا گیا ہے۔