منڈیا میں انتخابی تشدد ،جے ڈی ایس کے 3کارکن زخمی
منڈیا،9؍اپریل(ایس او نیوز؍یواین آئی) منڈیا علاقے میں لوک سبھا انتخابات کی تشہیر کے دوران جنتادل(سکیولر)اور آزادامیدوار سمالتا کے حامیوں کے درمیان ہوئی جھڑپ میں جنتادل (سکیوولر)کے تین کارکن زخمی ہوگئے ۔بی جے پی حامی آزاد امیدوار سمالتا کا براہ راست مقابلہ کرناٹک کے وزیراعلیٰ ایچ ڈی کمارسوامی کے بیٹے اور جنتادل (سکیولر) کے امیدوار نکھل کے ساتھ ہے ۔پولیس ذرائع کے مطابق زخمیوں کو اسپتال میں داخل کرایا گیا ہے اور معاملہ درج کرلیاگیاہے ۔حملے میں زخمی ہوئے لوگ موٹرسائیکل پر سوار ہوکر مسلسل ہارن دے رہے تھے جہاں سمالتا بھیڑ سے خطاب کررہی تھیں۔جنتادل (سکیولر)کے امیدوار نکھل اسپتال پہنچے اور انہوں نے پارٹی کے کارکنوں سے امن برقرار رکھنے کی اپیل کی۔انہوں نے پارٹی کارکنوں کو یقین دلایا کہ قصورواروں کو قانون کے تحت سزا دی جائے گی۔منڈیا لوک سبھا سیٹ پر سیاسی تشدد کا یہ پہلا واقعہ ہے ۔پولیس افسروں نے کہا کہ اس معاملے میں ابھی تک کسی کی گرفتاری نہیں ہوئی ہے ۔