جنوبی کینرا میں ڈینگی بخار کے مریضوں کی تعدادمیں ہوگیا مزید اضافہ۔ 22نئے معاملات کے ساتھ جملہ 426افرادہوئے متاثر
منگلورو21/جولائی (ایس او نیوز) ضلع جنوبی کینرا میں ڈینگی بخار سے متاثر ہونے والوں کی تعداد میں دن بدن اضافہ ہوتا جارہا ہے۔ دو دن قبل ہی ڈپٹی کمشنر سسی کانت سینتھل نے بتایا تھا کہ ضلع کے اندر ڈینگی سے متاثرہ افراد کی تعداد 404ہوگئی ہے۔تین مریض بخار کی وجہ سے فوت ہوئے ہیں جن میں سے ایک مریض کے خون کی جانچ سے ڈینگی بخارمیں مبتلا ہونے کی تصدیق ہوگئی ہے۔مزید مریضوں کا خون جانچ کے لئے منی پال اسپتال میں بھیج دیاگیا ہے۔
موصولہ تازہ رپورٹ کے مطابق محکمہ صحت نے اطلاع دی ہے کہ سنیجر کو ایک ہی دن میں جملہ 24افراد شدید بخار کے ساتھ اسپتالوں میں داخل کیے گئے جن میں سے 22مریض ڈینگی بخار میں مبتلا پائے گئے ہیں۔اس طرح اب ضلع میں ڈینگی سے متاثرہ مریضوں کی تعداد بڑھ کر 426ہوگئی ہے۔اس میں ڈھائی سو سے زیادہ متاثرین منگلورو تعلقہ میں ہی پائے گئے ہیں۔ضلع انتظامیہ کا کہنا ہے کہ %90مریض علاج کے بعد صحت یاب ہورہے ہیں۔ منگلورو سٹی کارپوریشن کے شعبہ صحت نے حفاظتی اقدامات میں تیزی لاتے ہوئے مچھروں کو مارنے اور ان کی افزائش روکنے پر زیادہ توجہ دی ہے۔سنیچر کے دن ایم سی سی کے عملے نے رہائشی علاقوں اور عوامی مقامات پر مچھروں کو مارنے والے دھویں کا استعمال کیا۔اس مقصد کے دو افراد پر مشتمل دو سو ٹیمیں تشکیل دی گئی ہیں۔اور تحفظاتی اقدامات کی نگرانی کے لئے ڈپٹی کمشنر نے چار سنیئر افسران کی قیادت میں چار ٹیمیں تشکیل دی ہیں۔ محکمہ صحت نے عوام کو مچھروں سے بچنے کی تدابیر اختیار کرنے کی ہدایت جاری کی ہے۔
ڈسٹرکٹ ملیریا کنٹرول آفیسرڈاکٹر نوین چندرا نے بتایا کہ ”کڈبا کی رہنے والی وینا نائیک کی موت گزشتہ تین ہفتے قبل ہوئی تھی۔ اس کے بعد فوت ہونے والے 8 سالہ لڑکے کرِش اور 11 سالہ شارداشیٹی کے بارے میں بھی شبہ ہے کہ وہ بھی ڈینگی وائرس سے متاثر تھے۔“