پیرس یکم اکتوبر(ایس او نیوز؍آئی این ایس انڈیا)فرانسی شہر آمیاں میں ایک فٹبال میچ کے دوران اسٹیڈیم میں نصب بیریئر ٹوٹنے سے انتیس تماشائی زخمی ہو گئے ہیں۔ حکام کے مطابق زخمیوں میں سے پانچ کی حالت تشویش ناک ہے۔ آمیاں اور لِل کی ٹیموں کے مابین کھیلے جانے والے میچ کے دوران یہ واقعہ بروز ہفتہ اس وقت پیش آیا جب میچ کے سولہویں منٹ میں مہمان ٹیم لِل کے شائقین پہلے گول پر جشن منا رہے تھے۔ تماشائیوں کی بڑی تعداد گول کی خوشی میں بیریئر کے قریب آ گئی اور دباؤ کے باعث پانچ فٹ بلند بیریئر ٹوٹ کر آمیاں کے شائقین پر جا گرا۔ حادثے کے بعد میچ منسوخ کر دیا گیا۔