انکاؤنٹر س سے دہلا اترپردیش، ایک ہفتے میں 29 انکاؤنٹر، 40 گرفتار، 24 زخمی
لکھنؤ، 26 جون(ایس او نیوز/آئی این ایس انڈیا)اتر پردیش میں قانون نظام پرمسلسل اٹھ رہی انگلیوں کے درمیان یوپی پولیس نے ایک بار پھر مجرموں پر نکیل کسنے کے لئے تابڑ توڑانکاؤنٹر شروع کر دیاہے۔یوپی میں گزشتہ ایک ہفتے میں 29 انکاؤنٹر ہوئے ہیں، جس میں 40 افراد گرفتار کئے گئے ہیں۔وہیں ایک لاکھ کا انعامی بدمعاش مارا بھی گیا ہے،اس کے علاوہ 24 بدمعاش زخمی ہوئے ہیں۔انکاؤنٹرکے دوران چار پولیس اہلکار بھی زخمی ہوئے ہیں۔اعداد و شمار پر غور کیا جائے تو گزشتہ 24 گھنٹے میں ہی 7 انکاؤنٹر یوپی پولیس نے کئے ہیں۔
گزشتہ دنوں وزیر اعلی یوگی آدتیہ ناتھ نے بگڑتے قانون ونظام پر پولیس افسران کی کئی بار کلاس لگائی،یہاں تک کہ یوگی نے نکمے اور ناکارہ حکام کو زبردستی ریٹائرمنٹ دینے کی بھی مانگ شروع کی ہے۔یوگی کی اس سختی کا نتیجہ یہ نکلا کہ 24 گھنٹوں میں ہی یوپی پولیس نے 7 مقامات پر مجرموں کی دھر پکڑ کی مہم چلائی۔اس میں بدمعاشوں اور پولیس کے درمیان فائرنگ ہوئی، جس میں ایک مجرم مارا گیا اور 6 ہسٹری شیٹر گرفتار ہوئے ہیں۔مظفرنگر ضلع میں پیر دیر رات چلے انکاؤنٹر میں پولیس نے ایک لاکھ روپے کے انعامی بدمعاش کو مار گرایا جبکہ ضلع میں ہوئے تین دیگر انکاؤنٹر کے دوران تین بدمعاش زخمی ہو گئے،اس کے علاوہ گورکھپور، کانپور اور سہارنپور اضلاع میں بھی اس طرح کے آپریشن کیے گئے۔مجرم آدیش بلیان مظفرنگر اور باغپت سمیت کئی اضلاع میں ہوئے قتل، لوٹ، ڈکیتی سمیت 30 سے زیادہ مقدمات میں ملوث تھا۔پولیس طویل وقت سے اس کو تلاش کر رہی تھی،اس پر ایک لاکھ روپے کا انعام بھی تھا۔علاقے میں اس کی موجودگی کی معلومات ملنے پر پولیس اور ایس ٹی ایف کی مشترکہ ٹیموں نے اسے ڈھیر کر دیا۔انہوں نے کہا کہ آدیش بلیان کے قبضے سے9 ملی میٹر اور32 بور کی پستول برآمد ہوئی ہے۔