بھٹکل تنظیم میں 280 لوگوں کو دیا گیا کورونا ٹیکہ؛ این آر آئیز والوں کے لئے 28 دنوں بعد دوسرا ٹیکہ دلانے کی کوشش جاری
بھٹکل 17 جون (ایس او نیوز) ضلع اُترکنڑا انتظامیہ اور بھٹکل تعلقہ انتظامیہ کے تعاون سے جمعرات کو حسب اعلان مجلس اصلاح و تنظیم میں 45 سال اور اس سے زائد عمر کے افراد کے لئے کورونا ٹیکہ کاری کا کیمپ منعقدکیا گیا تھا جو کامیابی کے ساتھ اختتام پذیر ہوا اس یک روزہ کیمپ میں 280 لوگوں نے ٹیکہ لگوایا۔ بتایا گیا ہے کہ تنظیم میں منعقدہ ویکسی نیشن کیمپ کے لئے آج 280 ڈوز ہی فراہم کئے گئے تھے۔
کیمپ صبح 9 بجے شروع ہوکر شام 4:30 بجے اختتام کو پہنچا، یہاں مرد حضرات کے لئے فرسٹ فلور پر اور خواتین کے لئے گراونڈ فلور پر ویکسی نیشن کا انتظام کیا گیا تھا جہاں بھٹکل مسلم یوتھ فیڈریشن کے نوجوانوں نے پوری مستعدی اور گرم جوشی کے ساتھ پورے دن کی کارروائی کو سنبھالا اور بہترین انتظام اور نظم و ضبط کے ساتھ عوامی خدمت انجام دینے میں تنظیم کا بھرپور تعاون کیا۔ تعلقہ ہیلتھ آفسر ڈاکٹر مورتی راج بھٹ اور تعلقہ ہاسپٹل کے نرسنگ اسٹاف بھی کیمپ میں پوری دلچسپی اور دلجمعی کے ساتھ رول ادا کرتے ہوئے دیکھے گئے۔
کیمپ کے دوران ویکسینیشن سرٹیفکیٹ میں کسی بھی قسم کے غلط اندراج کو درست کرنے کی بھی سہولت فراہم کی گئی تھی جسے جناب مبشر حُسین ہلارے نے بخوبی انجام دیا. پچھلے دنوں ویکسین لگوئے ہوئے تقریباً 50 سے زائد لوگوں نے اپنے، پتہ یا جنس سے متعلق غلط اندراج کو درست کروایا. تنظیم کی طرف سے بتایا گیا ہے کہ مزید کسی کو تصحیح کروانا ہو تو جناب مبشر ہلارے سے رابطہ کر سکتے ہیں۔
کیمپ کے کامیاب انعقاد پر مجلس اصلاح و تنظیم کی جانب سے میڈیا کوآرڈی نیٹر ڈاکٹر حنیف شباب صاحب نے مہم میں تعاون کرنے والے سبھی حضرات کی خدمت میں ہدیہ تشکر پیش کیا اور بتایا کہ آنے والے دنوں میں تنظیم کی جانب سے اس طرح کے کیمپ شہر کے دیگر علاقوں میں بھی منعقد کرنے کا منصوبہ بنایا گیا ہے۔
این آر آئیز والوں کے لئے خوش خبری: ویکسی نیشن کیمپ میں تشریف فرما تعلقہ ہیلتھ آفسر ڈاکٹر مورتی راج بھٹ نے ساحل آن لائن سے گفتگو کرتے ہوئے بتایا کہ این آر آئیز والوں کو ویکسین کا پہلا ڈوز دینے کے 28 دن بعد دوسرا ڈوز دینے کے احکامات سرکا ر کی جانب سے جاری کئے گئے ہیں، لیکن اس کی ذمہ داری ضلع کے ڈپٹی کمشنروں کو سونپی گئی ہے، انہوں نے بتایا کہ فی الحال اُترکنڑا ڈپٹی کمشنر کی جانب سے این آر آئیز والوں کو دوسرا ڈوز دینے کے تعلق سے بھٹکل محکمہ ہیلتھ کو کوئی ہدایت نہیں دی گئی ہے۔اگر ڈپٹی کمشنر کی طرف سے ہمیں کوئی احکامات موصول ہوں گے تو ہم کام کو آگے بڑھاسکتے ہیں۔
اس ضمن میں مجلس اصلاح و تنظیم بھٹکل کے صدر جناب ایس ایم پرویز نے بتایا کہ وہ این آر آئیز والوں کو دوسرا ڈوز دینے کے تعلق سے بھٹکل اسسٹنٹ کمشنر سے ملاقات کریں گے اور ضروری اقدامات کرتے ہوئے اس بات کی کوشش کریں گے کہ این آر آئیز والوں کے لئے کورونا ویکسین کا دوسرا ڈوز جلد سے جلد دیا جاسکے۔