پاکستان: کورونا سے اب تک 26 ہلاک، متاثرین کی تعداد 2040 پہنچی
اسلام آباد،یکم اپریل (ایس او نیوز؍یو این آئی) پاکستان میں کورونا وائرس (کووڈ 19) کا پھیلاؤبڑھتا جا رہا ہے اور بدھ کے روز وائرس متاثرین کی تعداد 2000 سے تجاوز کر گئی ہے جبکہ اس سے متاثر اب تک 26 افراد کی موت ہو چکی ہے۔ پاکستان میں گزشتہ 24 گھنٹوں کے دوران کوروناوائرس متاثرین کے 192 نئے کیسز سامنے آئے جس کے بعد متاثرین کی تعداد بڑھ کر 2040 ہو گئی ہے۔ اس سے پہلے ملک میں متاثرین کی تعداد 1848 تھی۔
پاکستان کا صوبہ پنجاب کورونا وائرس سے سب سے زیادہ متاثر ہے۔ یہاں متاثرین کی تعداد 708 ہے جبکہ اب تک 9 افراد کی موت ہو چکی ہے۔ سندھ میں 679 متاثرین ہیں اور 8 کی موت ہوئی ہے۔ خیبر پختونخوا میں 253 افراد اس وائرس سے متاثر ہوئے ہیں اور 6 کی موت ہو چکی ہے۔ بلوچستان میں 158 افراد کورونا کی زد میں ہیں اور ایک کی موت ہوئی ہے۔ علاوہ ازیں گلگت بلتستان میں متاثرین کی تعداد 178 ہے اور دو کی موت ہوئی ہے، جب کہ دارالحکومت اسلام آباد میں کورونا وائرس متاثرین کی تعداد 58 پہنچ گئی ہے اور مقبوضہ کشمیر میں اب تک 6 افراد اس وائرس سے متاثر ہوئے ہیں۔