بنگلورو میں کورونا سے اموات میں اضافہ : حالات انتہائی سنگین، ایک ہی دن ادا کی گئیں 26مُردوں کی اجتماعی آخری رسومات
بنگلورو:یکم مئی (ایس اؤ نیوز)بنگلورو میں کورونا وباء سے مرنے والوں کی تعداد میں مسلسل اضافہ ہورہاہے۔ سیکڑوں افراد کی آخری رسومات کو ادا کرنا ناممکن ہوتاجارہاہے۔ اموات کی کثرت اور آخری رسومات میں تاخیر سے عوام ایک عجیب قسم کی کیفیت میں مبتلا دیکھے گئے ہیں۔
حالات کو دیکھتے ہوئے ریاستی حکومت نے مرنے والوں کی آخری رسومات کو ادا کرنے کے لئے شہر کےنواحی علاقے تاورکیرے کے قریب عارضی شمشان گھاٹ کا قیام کیا ہے جہاں کورونا سے مرنے والوں کی چتا ئیں جلائی جانے کے لئے مناسب انتظام کیا گیا ہے۔ پتہ چلا ہے کہ یہاں جمعہ کو صرف ایک ہی دن میں 26 نعشوں کی اجتماعی طورپر چتا جلائی گئیں۔
شمشان گھاٹ پر جب اجتماعی آخری رسومات ادا کی جارہی تھیں تو خاندان والے اور رشتہ دار دور ہی کھڑے ہوکر نظار ہ کرنے پر مجبور تھے۔شہر میں اموات کی کثرت کو دیکھتے ہوئے عوام خوف وہراس اورپریشانی میں مبتلا ہیں۔ جبکہ صدر مقام بنگلورو سے قریب والے عارضی شمشان گھاٹ پر مردے جلائے جارہے تھے تو رشتہ داروں کو ان کے قریب جانے کی بھی اجازت نہیں دی جارہی تھی البتہ چند لوگ پی پی ای کٹ پہن کر آخری مرتبہ چہرہ دیکھنے پہنچے بھی تھے تو شمشان گھاٹ پر بھی کچھ لوگ آخری رسومات کی ادائیگی کرنے کے دوران مناظر کو اپنے موبائیل میں قید کرتےہوئے دیکھے گئے۔