بنگلورو،18؍اکتوبر (ایس او نیوز) کیمپے گوڈا انٹرنیشنل ایئر پورٹ کے کارگو والے حصے سے   2.594 کلو گرام سونا غائب ہونے کا ایک حیران کن  معاملہ سامنے آیا ہے جس کے بعد 5 کسٹم افسران کے خلاف کیس درج کردیا گیا ہے۔

ذرائع سے ملی اطلاع کے مطابق یہ 2012سے  2014کے درمیان ایئر پورٹ پر  اسمگلنگ کے 13 مختلف معاملات میں ضبط کیاگیا سونا تھا جسے ایئر پورٹ کے گودام میں محفوظ رکھا گیا تھا۔معلوم ہوا ہے ویجیلنس آفیسر کی طرف سے اندرونی تحقیقات کے وقت  2.594کلو گرام سونا گم ہوجانے کا پتہ چلا تھا۔پھرجوائنٹ کمشنر آف کسٹمز ایم جے چیتن نے  جو شکایت سی بی آئی کے پاس درج کروائی تھی اس کی بنیاد پر  6 لوگوں کے خلاف ایف آئی آر رجسٹر کرلی گئی ہے اس میں  5  کسٹمز افسران شامل ہیں،جن کے نام ونود چینپّا اسسٹنٹ کمشنر کسٹمز اینڈ سینٹرل ایکسائز، کے کیشو اسسٹنٹ کمشنر، این جے روی شیکھر سپرنٹنڈنٹ  ، ڈین ریکس اور کے ای لنگا راجو بتائے گئے  ہیں۔