دو خوفناک سڑک حادثات یوپی میں 24اور ایم پی میں 6/مزدور ہلاک، 100سے زیادہ زخمی
لکھنؤ،بھوپال،17؍مئی (ایس او نیوز؍ایجنسی) لاک ڈاؤن کے باعث پیدا شدہ انسانی المیہ میں بھوک اور نقل مکانی کی چیخ و پکار کے ساتھ جب مہاجرمزدوروں کی حادثاتی موت کی خبریں سماعت سے ٹکراتی ہیں، تو ’اچھے دنوں‘ کے وعدے یاد آنے لگتے ہیں - ان مزدوروں کی قسمت میں بیچارگی ہی لکھی ہے، کبھی یہ ٹرین کے ٹریک کے نیچے کچلے جاتے ہیں، تو کبھی روڈ ویز کی بس انہیں کچل کر آگے بڑھ جاتی ہے، تو کبھی ان مزدوروں کا ٹرک ہی دوسرے ٹرک سے ٹکرا جاتا ہے، جس کے باعث وہ حادثاتی طورپر ہلاک ہوجاتے ہیں -آج صبح یوپی کے اوریا او رایم پی کے ساگر - مہاراشٹر ہائی وے پرچھین والا تھانہ حلقہ کے تحت نیوار گھاٹی سے خبریں ملیں کہ علی الترتیب اوریا میں 24/اور چھین والا میں 6مزدور سڑک حادثہ کے باعث ہلاک ہوگئے، جس سے ہلاک شدہ مزدوروں کی تعداد31/ہوگئی - موصولہ اطلاع کے مطابق یوپی کے اوریا ضلع میں مہاجر مزدور ایک حادثے کا شکار ہو گئے، جس میں 24 مزدوروں کی المناک موت ہو گئی-خیال رہے کہ ٹرک میں سوار یہ مزدور ہریانہ اور راجستھان سے اپنے آبائی وطن نقل مکانی کر رہے تھے- اس حادثہ میں عمومی طور پر مزدور مغربی بنگال، جھارکھنڈ اور بہار کے تھے، اور یہی مزدور حادثہ کے شکار ہوئے ہیں - اس المناک حادثہ پر پی ایم مودی،کانگریس کی صدر سونیا گاندھی اور لیڈر راہل گاندھی سمیت متعدد لیڈروں نے اظہارِ ا فسوس کیا ہے-