بنگلورو، 6؍جنوری (ایس او نیوز) کووڈ کی ممکنہ تیسری لہر سے نمٹنے احتیاطی طور پر 24گھنٹے کووڈ ویکسیی نیشن سنٹرکا شہر میں آغازکیا گیاہے۔ ریاستی وزیربرائے اعلیٰ تعلیم ڈاکٹر سی این اشوتھ نارائن نے سبرا منیا نگر اور ویالی کاول کے نئے سٹی پرائمری ہیلتھ سنٹرز اور کے سی جنرل اسپتال ملیشورم کے سامنے سرکاری اسکول کے احاطہ میں 24 گھنٹے کووڈ ویکسی نیشن سنٹر زکا افتتاح کیا۔

اس موقع پر اخباری نمائندوں سے بات کر تے ہوئے انہوں نے کہا کہ 15سے18سال کی عمر کے بچوں کو ویکسین دینے کا آغاز کیا گیا ہے۔ساتھ ساتھ طبی کارکنوں اور 60سال زیادہ عمر کے افراد اور مختلف امراض میں مبتلا افراد کو بوسٹر ڈوز دیا جائے گا، جس کے لئے ڈاکٹروں،طبی عملہ اور ادویات کو تیار کیا گیا ہے۔ انہوں نے کہا کہ ریاست میں گذشتہ چند دنوں سے کووڈ معا ملات میں اضافہ کو کووڈ کی تیسری لہر نہیں کہا جاسکتا۔اس سلسلہ میں انتظار کیا جا ئے گا تا ہم حکومت نے تیسری لہر سے نمٹنے کی تیاری کر رکھی ہے۔ انہوں نے بتا یا کہ کاڑو ملیشور، سبرامنیا نگر وارڈ میں سٹی ہیلتھ سنٹر کا آغاز کیا گیا ہے اور طبی خدمات کے لئے عارضی عمارت میں یو پی ایچ ڈی کا آغاز کیا گیا ہے۔ بی بی ایم پی ویسٹ زون کے جوائنٹ کمشنر شیوسوامی نے کہا کہ سٹی پرائمری ہیلتھ مراکم کی نئی عمارتوں کی تعمیر کے لئے منصوبہ تیار ہے،جلد ہی تعمیری کام شروع کیا جا ئے گا۔

انہوں نے بتا یا کہ ہیلتھ سنٹر میں ایم بی بی ایس ڈاکٹرز اور طبی عملہ ہر دن دستیاب ہوگااور آنے والے دنوں میں لیبا ریٹری، ایکسرے، ڈینٹل سرویسز،آنکھوں اور ریٹینا کی جانچ،فزیو تھیراپی،ویکسین سنٹر اور ماہر ڈاکٹروں کے ورچیول کلینک نئی عماتوں میں فراہم ہوں گے۔