بھنڈ،31؍جولائی (ایس او نیوز؍ایجنسی) مدھیہ پردیش میں زوردار بارش کے دوران بھِنڈ کی ضلعی جیل کی ایک دیوار گرنے سے  22 قیدی زخم ہوگئے جن میں دو کی حالت نازک بتائی گئی ہے۔  حادثہ ہفتہ کی صبح پیش آیا۔

 ذرائع  کےمطابق  صبح تقریباً ساڑھے پانچ بجے جیل کی ایک بیرک کی دیوار اچانک گر گئی۔ جس وقت حادثہ پیش آیا بیرک نمبر 6 میں کل 64 قیدی موجود تھے، تاہم ان میں سے 22 قیدی ملبے کی زد میں آ گئے۔ زخمی ہونے والے تمام قیدیوں کو علاج کے لئے ضلع اسپتال بھیجا گیا ہے، جبکہ دو قیدیوں کو سنگین حالت کے پیش نظر گوالیار کے لئے منتقل کیا گیا ہے۔

سمجھا جارہا ہے کہ جیل احاطے کی عمارت پرانی ہونے کے سبب اس کی دیوار گری ہے۔ حادثہ کی اطلاع ملتے ہی  جیل اور ضلع کلکٹر، ایس پی اور تمام اعلیٰ افسران موقع پر پہنچے اور حالات کا جائزہ لیا۔

ذرائع کے مطابق صبح تقریباً 5 بجے بیرک نمبر 7 کا پلاسٹر گرنے لگا تھا۔ اس کی اطلاع فوری طور پر اعلیٰ افسران کو دی گئی لیکن تھوڑی ہی  دیر بعد  بیرک نمبر 6 کی دیوار اور چھت بھربھرا کر گر گئی۔ ذرائع کی مانیں تو یہ دیوار 150 سال پرانی تھی۔ بھنڈ کے ایس پی اور کلکٹر نے بتایا کہ بھنڈ جیل میں کل 255 قیدی بند ہیں اور سبھی پوری طرح محفوظ ہیں۔ صرف 22 قیدی زخمی ہیں، جن کا علاج کیا جا رہا ہے۔ فی الحال پورے معاملہ کی جانچ کی جا رہی ہے۔