سعودی عرب کے جدہ میں پھنسے 21 ہندوستانی، کام کا جھانسہ دے کر چھینا گیا ویزا اور پاسپورٹ
کولکاتہ،23/اکتوبر(ایس اونیوز/ آئی این ایس انڈیا)ملازمت کے نام پر سعودی عرب کے جدہ گئے 21 ہندوستانیوں کو وہاں یرغمال بنا لیا گیا ہے۔ان میں سے 20 مغربی بنگال سے ہیں جبکہ ایک ممبئی سے،تمام پیشے سے سونے کے کاریگر ہیں۔اپنے خاندان کے لئے مزید پیسے کمانے کی توقع لے کر ایک ایجنٹ کے ذریعے وہ جدہ گئے تھے،ان 21 ہندوستانیوں کو گولڈ مارکیٹ میں نوکری کا وعدہ کیا گیا تھا، لیکن بدقسمتی سے وہ سب یہ سمجھ نہیں پائے کہ انہیں اسمگلنگ کرکے دوسرے ملک لے جایا گیا ہے،ان سے ویزا اور پاسپورٹ بھی چھین لیا گیا ہے۔ان میں سے 4 ہاوڑہ سے تھے، 10 ہگلی، 3 مشرقی بردھمان سے، 2 شمالی اور ایک جنوبی 24 پرگنہ ضلع سے تھے،ایک ممبئی کے تھانے سے تھا۔یہ تمام ممبئی کے گولڈ مارکیٹ میں کاریگر کے طور پر کام کرتے تھے۔ نیشنل اینٹی ٹریفکنگ کمیٹی کے صدر شیخ جننار علی نے بتایا کہ انہیں شاتن پال کے خاندان سے کال آئی۔ان کے ذریعے انہیں پتہ چلا کہ دو سال پہلے ایک ایجنٹ کی مدد سے شاتن جدہ کے مشالی فیکٹری میں کام کرنے گئے تھے،وہ سیاح ویزا کے تحت وہاں گئے تھے،ویزا پہلے ہی ایکسپائر ہو چکا ہے اور طویل وقت تک انہوں نے اپنے رشتہ داروں سے بات نہیں کی ہے،کافی کوششوں کے بعد انہوں نے اپنے خاندان سے بات کی اور بتایا کہ ان کا پاسپورٹ اور ویزا جدہ میں لینڈ کرتے ہی ان سے لے لیا گیا تھا۔خاندان نے جدہ میں ہندوستانی سفارت خانے میں بات کرنے کی کوشش کی لیکن ناکام رہے۔شاتن کے خاندان نے علی کو بتایا کہ 21 لوگوں کو وہاں جھوٹے کام کا خواب دکھا کر لے جایا گیا ہے۔کئی کوششوں کے بعد اس نمبر پر رابطہ ہوا جس سے شاتن نے کال کی تھی۔اس کے بعد ایک دوسرے شخص نظرالاسلام سے رابطہ کیا گیا،انہیں نیشنل اینٹی ٹریفکنگ کمیٹی اپلی کیشن ڈاؤن لوڈکرنے اور شکایت درج کرنے کو کہا گیا۔ جننار علی نے بتایا کہ وزارت خارجہ اور وزیر اعلی ممتا بنرجی کو پورے معاملے کے بارے میں بتا دیاگیاہے۔جدہ میں ہندوستانی سفارت خانے سے رابطہ کیا گیا ہے،انہیں صحیح سلامت واپس لانے کی کوششیں کی جا رہی ہیں، کیونکہ وہ لوگ وہاں بغیر پرسنل فنڈ، ویزا اور ویلڈ پاسپورٹ کے پھنسے ہوئے ہیں۔