یلاپور میں نابالغ لڑکیوں کی گم شدگی کے2الگ الگ معاملات۔پوکسو ایکٹ کے تحت 2ملزمین گرفتار
یلاپور 21/ستمبر (ایس او نیوز) ایک نابالغ لڑکی جو12ستمبر کو کمپیوٹر کلاس میں جانے کے لئے نکلی تھی، جب واپس نہیں آئی تو گھر والوں نے اس کی گم شدگی کی شکایت پولیس میں درج کروائی تھی۔
اس شکایت پر کارروائی کرتے ہوئے یلاپور پولیس نے مذکور ہ لڑکی کو ڈھونڈنکالا ہے اور اس لڑکی کو اغوا کرنے کے الزام میں مہاراشٹرا کے عثمان آبادکے رہنے والے اسلم اسحاق تنبولی(30سال) کو پونے سے گرفتار کرلیا ہے۔ پوکسو قانون کے تحت مقدمہ دائر کرتے ہوئے ملزم کو عدالتی حراست میں بھیجا گیا ہے۔
12ستمبر کو ہی مندر جانے کا کہہ کر گھر سے نکلنے والی ایک اور نابالغ لڑکی بھی جب واپس نہیں لوٹی تولڑکی کے والدین کی طرف سے پولیس کے پاس گم شدگی کی رپورٹ درج کروائی گئی تھی۔ انہوں نے شبہ ظاہر کیا تھا کہ لڑکی کو کسی نے بہلا پھسلا کر اغوا کرلیا ہے۔ یلاپور پولیس نے کیس درج کرلینے کے بعد تحقیقات شروع کی اور انکولہ تعلقہ کے کسبے گرام میں ہلولّی کے رہنے والے دیویندرا عرف ناگیش سدّی (12سال) کو گرفتار کرتے ہوئے لڑکی کو برآمد کرلیا۔اس کے علاوہ لڑکی کو اغوا کرنے میں معاون بننے والے موتیش سنتان سدّی کوبھی بیلکی گرام سے گرفتار کرلیا ہے۔ ان دونوں ملزمین پر پوکسو ایکٹ کے تحت مقدمہ دائر کرنے کے بعدعدالتی حراست میں بھیجا گیا ہے۔
نابالغ لڑکیوں کی گم شدگی اور اغوا کے دو نوں معاملات بحسن وخوبی حل کرنے کی مہم میں یلاپور سرکل انسپکٹر ڈاکٹر منجو ناتھ نائک کی قیادت میں سب انسپکٹر بی جی لمانی، پروبیشنری پی ایس آئی رویندرا برادر، اے ایس آئی پاوسکر اور دیگر عملے نے حصہ لیا۔
اس مہم کو کامیابی سے انجام دینے پر ضلع ایس پی شیوپرکاش دیو راجو، ایڈیشنل ایس پی گوپال بیاکوڈاور دیگر افسران نے تحقیقاتی ٹیم کی ستائش کی ہے۔