اُترکنڑا کے سداپور میں پھر دو کی رپورٹ آئی کورونا پوزیٹیو؛ والد کو پہلے ہی بھیجا گیا تھا کاروار، اب دو لڑکیوں کو بھی کیا گیا کاروار روانہ
بھٹکل 3/جون (ایس او نیوز) ضلع اُترکنڑا کے سداپور میں اب دو لڑکیوں کی رپورٹ کورونا پوزیٹیو آنے کی اطلاع موصول ہوئی ہے جن کی عمر 20 سال اور 18 سال بتائی گئی ہے۔
ذرائع سے ملی اطلاع کے مطابق دونوں لڑکیاں اپنے ایک بھائی اور ماں باپ کے ساتھ 19 مئی کو مہاراشٹرا کے تھانہ سے سداپور آئے تھے، آتے ہی انہیں رانی چنمّا رہائشی اسکول میں کورنٹائن کیا گیا تھا، بتایا گیا ہے کہ 27 مئی کو ان کے 54 سالہ والد کی رپورٹ پوزیٹو آئی تھی جس کے بعد اُنہیں کاروار کمس لے جایا گیا تھا۔ ذرائع نے بتایا کہ جمعرات کو ان دونوں لڑکیوں میں کورونا کی علامت دیکھی گئی تھی جس کے بعد دونوں لڑکیوں کو اسکول سے نکال کر سرکاری اسپتال میں نگرانی میں رکھا گیا تھا، ان دونوں کی رپورٹ اب کورونا پوزیٹو آئی ہے۔اس بات کی بھی خبر ملی ہے کہ ان کے بھائی اور ماں کی رپورٹ نیگیٹو آئی ہے۔
دونوں لڑکیوں کی رپورٹ کورونا پوزیٹو آنے کے بعد دونوں لڑکیوں کو کاروار کمس میں منتقل کیا گیا ہے۔ اس کے ساتھ سداپور میں کورونا پوزیٹو کے معاملات بڑھ کر اب چار ہوگئے ہیں۔ اسی طرح ضلع اُترکنڑا میں کورونا پوزیٹو معاملات کی تعداد بڑھ کر 81 ہوگئی ہے جس میں سے 46 اسپتال سے صحت یاب ہوکر ڈسچارچ ہوچکے ہیں، اب 35 کورونا سے متاثرہ لوگ کمس میں روبہ صحت ہیں۔
ویسے سداپور تحصیلدار منجولا بھجنتری نے دونوں لڑکیوں کی رپورٹ کورونا پوزیٹو آنے کی تصدیق کی ہے اور دونوں کو کاروار شفٹ کئے جانے کی بھی اطلاع دی ہے، اس بناء پر توقع ہے کہ آج شام کو موصول ہونے والی ہیلتھ بلٹین میں ان دونوں کا تذکرہ رہےگا۔
