مغربی بنگال میں پھر تشدد، 2 افراد ہلاک، ممتا بنرجی نے بلائی ایمرجنسی میٹنگ
مغربی بنگال،20/جون (ایس او نیوز/ آئی این ایس انڈیا) کولکاتہ سے کچھ دور واقع بھاٹپورا میں جمعرات کو پھر تشدد ہوا ہے۔یہاں ایک نابالغ لڑکے کو گولی مار کر قتل کر دیا گیا۔اس کی عمر محض 17 سال تھی۔اس معاملے میں کل 2 لوگوں کی موت ہوئی ہے اور 3 افراد زخمی ہوئے ہیں۔نامعلوم افراد کے درمیان جمعرات کی صبح تنازعہ ہوا تھا۔نابالغ لڑکے کا نام رام بابو شا تھا اور وہ پانی پوری فروخت کرتا تھا۔جو تین افراد زخمی ہوئے ہیں ان کی حالت سنگین ہے اور ان کا اسپتال میں علاج چل رہا ہے۔معلومات کے مطابق اس تنازعہ میں دیسی بم اور گولیوں کا استعمال ہوا۔ پولیس نے حالات پر قابو کرنے کے لئے آنسو گیس کے گولے چھوڑے۔وہیں کچھ رپورٹ میں دعوی کیا گیا کہ پولیس کو حالات پر کنٹرول کرنے کے لئے فائرنگ کرنی پڑی۔مغربی بنگال کی وزیر اعلی ممتا بنرجی نے اس معاملے پر ایمرجنسی میٹنگ بلائی ہے۔یہ واقعہ شمال24 پرگنہ ضلع میں ڈائرکٹر جنرل آف پولیس کی طرف سے نئے پولیس اسٹیشن کی عمارت کا افتتاح کرنے سے کچھ گھنٹے پہلے ہی پیش آیا۔پولیس افسر جب راستے میں تھے، اس سے کچھ دیر پہلے ہی بم دھماکہ ہوا۔اس کے بعد ان کا قافلہ پلٹ گیا اور واپس کولکاتہ چلا گیا۔لوک سبھا انتخابات کے دوران بھی مغربی بنگال میں تشدد کے معاملے سامنے آئے تھے۔پولیس افسران اور ریپڈ ایکشن فورس کی ایک ٹیم کو علاقے میں تعینات کیا گیا ہے۔تنازعہ کی وجہ سے کاروبار ٹھپ رہا اور دکانوں کے شٹر بند رہے۔بھاٹپورا میں اسمبلی کے ضمنی انتخاب کے دوران بھی تشدد ہواتھا۔