بھٹکل میں دو مختلف سڑک حادثات میں تین زخمی ، بیلکے نیشنل ہائی وے پر کاراور بس کی ٹکر،شہر کے بیچوں بیچ بھی کار اور بائک کی ٹکر
بھٹکل8/ڈسمبر (ایس او نیوز) بھٹکل میں دو مختلف مقامات پر ہوئے سڑک حادثات میں تین لوگ زخمی ہوگئے جن میں دو افراد کا تعلق مڈکیری سے جبکہ ایک کا تعلق بھٹکل سے ہے۔
دوپہر قریب دو بجے شہر کے بیچوں بیچ پی ایل ڈی بینک کے قریب نیشنل ہائی وے پر ایک کار اور بائک کی ٹکر میں بائک سوار شدید زخمی ہوگیا جبکہ کار کا اگلے شیشہ سمیت اسکوٹر کو شدید نقصان پہنچا۔ بائک سوار کو سرکاری اسپتال منتقل کیا گیا ہے۔
دوسرا حادثہ شام قریب پانچ بجے بیلکے نیشنل ہائی وے پر پیش آیا جب انکولہ سے مڈکیری جانے والی کار مخالف سمت سے آنے والی ایک سرکاری بس سے تیز رفتاری کے ساتھ ٹکرا گئی۔ حادثے میں کار پر سوار دونوں افراد شدید زخمی ہوگئے جنہیں بھٹکل سرکاری اسپتال میں داخل کیا گیا ہے۔
ذرائع نے بتایا کہ بیلکے نیشنل ہائی وے پر بس غلط سائیڈ پر آگیا تھا ، کار نے بس سے بچنے کی ہرممکن کوشش کی، مگر ٹکر سے نہ بچ سکی، ٹکر لگنے کے بعد کار بے قابو ہوکر قریبی نالے میں گرگئی۔ اس دوران بس کے پیچھے سے آرہی ایک ٹورسٹ بس بھی بے قابو ہوگئی اور سرکاری بس سے ٹکراگئی۔
ٹکر لگنے سے کار کے پرخچے اُڑگئے ہیں اور کار کو شدید نقصان پہنچا ہے، اسی طرح بس اور ٹورسٹ بس کے اگلے حصے کو بھی تھوڑا بہت نقصان پہنچا ہے۔
کار پر سوار دو زخمیوں کی شناخت مڈکیری کے پنرائی پٹن کے رہائشی بتائے گئے ہیں۔
بھٹکل پولس تھانہ میں معاملہ درج کیا گیا ہے۔
