ٹی ای ٹی امتحان کے نتائج کا اعلان: پرائمری اسکولوں کیلئے 18960اور ہائی اسکولوں کیلئے 26114امیدوار اہل
بنگلورو،15؍ستمبر (ایس او نیوز) محکمہ تعلیمات عامہ کے سنٹرل داخلہ یونٹ کی جانب سے گزشتہ اگست میں منعقد ٹیچرس ایلجبلٹی ٹسٹ (ٹی ای ٹی) کے نتائج کا اعلان کیا گیا ہے جس کے تحت 45,074نے اساتذہ کی اہلیت حاصل کی ہے۔ اطلاع کے مطابق ان میں پرائمری اسکول اساتذہ کے طور پر 18,960اور ہائی اسکول اساتذہ کے طو رپر 26,114 افراد نے اہلیت پائی ہے۔ محکمہ تعلیمات عامہ کے ذرائع نے بتایا کہ اس مرتبہ ٹی ای ٹی امتحان کے پہلے پرچہ کے لئے پرائمری اسکول پہلی تا 5ویں جماعت کے اساتذہ) کل 1,02,282اور دوسرے پرچہ کیلئے (چھٹی تا 8ویں جماعت) 1,49,552 افراد سمیت کل 2,51,834 افراد نے رجسٹریشن کرایا تھا۔ ان میں پہلے پرچے کے لئے 91,176 اور دوسرے پرچہ کے لئے 1,38,710سمیت کل 2,31,881افراد نے امتحان لکھا۔پرائمری اسکول اساتذہ کے لئے اہلیت پانے والے پہلے پرچہ میں حاضر ہونے والوں میں 18,960اور ہائی اسکول اساتذہ کی اہلیت پانے والے دوسرے پرچہ کے 26,114نے کامیابی حاصل کی اور ریاست بھر کے اسکولوں میں اساتذہ کے طور پر خدمت انجام دینے کی اہلیت حاصل کی، اس کے علاوہ سرکاری اسکولوں کے اساتذہ کی بھرتی کے لئے حکومت کی جانب سے نامزدگی کے دوران بھی عرضیاں داخل کرسکتے ہیں۔بتایا جاتا ہے کہ عام زمرہ کے امیدواروں کے پرچوں میں 60فیصد اور درج ذات وفہرست طبقات ومعذورین امیدواروں کے لئے 55فیصد اہلیتی مارکس دئے گئے۔ نتائج میں 33ہزار نے فرسٹ کلاس میں کامیابی حاصل کی ہے۔ محکمہ نے بتایا کہ امیدواروں کو امتحان کے دوران او ایم آر شیٹ میں مقررہ باکس میں دستخط اور انگوٹھے کا نشان لگانے واضح طور پر ہدایت دینے کے باوجود مختلف اضلاع کے امتحانی مراکز میں 21امیدواروں نے دستخط نہیں کیا ہے اس لئے ان امیدواروں کے نتائج روک لئے گئے ہیں۔