ہنگامی ضرورت کے لئے اب 100 نمبر کے بجائے 112 نمبر ڈائل کیا جائے
کاروار ،2 ؍ مئی (ایس او نیوز) مرکزی حکومت نے پورے ملک میں ہنگامی ضرورت کے لئے 'ایک ملک ۔ ایک نمبر' اسکیم کے تحت جو "ایمرجنسی ریسپانس سپورٹ سسٹم"(ای آر ایس ایس) وضع کیا ہے اس کے لئے 112 ڈائل کرنے کی ملک گیر سہولت عام کی گئی ہے۔ اس اسکیم کے تحت کسی بھی ناگہانی مصیبت یا حالات کے دوران پولیس، فائر بریگیڈ،غیرہ کے لئے الگ الگ نمبر ڈائل کرنے کے بجائے صرف 112 نمبر پر رابطہ کرنا کافی ہوگا۔
شمالی کینرا میں بھی یہ سہولت اب جاری ہوگئی ہے۔ ضلع ایس پی شیوپرکاش دیوراجو نے کاروار کے ڈسٹرکٹ آرمڈ پولیس پریڈ گراونڈ پر 112 نمبر کے ساتھ منسلک 16 گاڑیوں کو ہری جھنڈی دکھاتے ہوئے کہا کہ ضلع کے عوام اب اسی نمبر پر کسی بھی ہنگامی صورت حال کی اطلاع دیتے ہوئے مدد طلب کرسکتے ہیں۔
انہوں نے کہا کہ یہ مرکزی حکومت کی بہت ہی کارآمد اسکیم ہے۔ اس ہنگامی ضرورت کے لئے جو مختلف نمبر چل رہے تھے اب وہ سب خدمات اس 112 نمبر پر ڈائل کرنے سے فوری طور پر فراہم کی جائیں گی۔ اس اسکیم پر عمل درآمد کے لئے ضلع ایس پی کی قیادت میں ایک کمیٹی تشکیل دی گئی ہے۔ مرکزی حکومت کی ہدایت کے مطابق ریاستی حکومت الگ الگ اضلاع کے لئے مرحلہ وار 112 نمبر کی گاڑیاں فراہم کرے گی۔ ریاستی پولیس ہیڈ کوارٹر کی طرف سے فی الحال 16 گاڑیاں فراہم کی گئی ہیں۔ یہ گاڑیاں اس سے قبل 100 نمبر پر جو کال آتی تھیں اور جرائم کی صورت حال کو سامنے رکھتے ہوئے ضلع کے مختلف مقامات کے لئے متعین کی گئی ہیں۔
اس نمبر پر کال، ایس ایم ایس، یا [email protected] پر آنے والے ای میل یا http://ka.need.in پر آنے والی درخواست یا کسی مقام سے پیانک سگنل (خوف و دہشت کا اشارہ) ملنے پر جائے وقوع سے قریب ترین علاقے میں موجود ہنگامی امداد والی گاڑی سے متاثرہ فرد/افراد کو جلد از جلد مدد پہنچائی جاتی ہے۔ یہ ایمر جنسی خدمات عوام کے لئے 24x7 دستیاب رہیں گی ۔
اس موقع پر ایڈیشنل ایس پی ایس بدری ناتھ ، ڈسٹرکٹ آرمڈ ریزرو فورس کے ڈی وائی ایس پی آر دلیپ کلگُجّی، سی پی آئی سنتوش شیٹی وغیرہ موجود تھے۔
یاد رہے کہ ایمبولنس کو چھوڑ کر دیگر سبھی ایمرجنسی خدمات کے لئے اب 112 ڈائل کرنا کافی ہوگا، البتہ ایمبولنس سروس کے لئے 108 ڈائل کرنا ضروری ہوگا۔