بھروچ،2/مئی (ایس او نیوز/ایجنسی) گجرات کے بھروچ میں جمعہ کی نصف شب کوویڈ اسپتال میں آگ لگنے سے 18 مریض دم توڑ گئے۔ اس حادثے سے کچھ پریشان کن مناظر سامنے آئے ہیں جہاں کچھ مریضوں کی باقیات بستروں اور اسٹریچروں پر دکھائی دیتی ہیں۔ رات کے تقریباً ایک بجے بھروچ پٹیل ویلفیئر کوویڈ وارڈ میں آگ لگنے کی وجہ سے افراتفری پھیل گئی۔
چار منزلہ اسپتال میں تقریبا 50 مریض داخل تھے۔ کچھ لوگوں کو مقامی افراد اور فائر فائٹرز کی مدد سے بچالیا گیا ہے ، ایک پولیس آفیسر نے بتایا ہے کہ حادثے کے فورا بعد 12 مریضوں کی موت ہو گئی ہے۔بھروچ کے سینئر پولیس آفیسر راجندر سنگھ کے مطابق 12 مریض جلنے اور دم گھٹنے کی وجہ سے ہلاک ہوئے ، ان کا کہنا تھا کہ ابھی تک یہ واضح نہیں ہو سکا ہے کہ باقی 6 مریضوں کی موت دیگراسپتال میں شفٹ کرنے کے دوران ہوئی یا آتشزدگی کی وجہ سے ہوئی۔ بھروچ کا یہ اسپتال بھروچ جمشید پور شاہراہ پر دارالحکومت احمد آباد سے تقریبا 190 190 کلومیٹر دور ہے۔
گجرات میں بھروچ سے پہلے متعدد ریاستوں میں آگ لگنے سے کووڈ مریض دم توڑ چکے ہیں۔ 26 اپریل کو گجرات کے شہر سورت کے ایک اسپتال میں آگ لگنے سے 4 مریض ہلاک ہوگئے تھے ۔ اس سے قبل بدھ کے روز مہاراشٹرا کے تھانے میں واقع ایک اسپتال میں آتشزدگی کے باعث 4 کوویڈ مریض دم توڑ گئے تھے ، جب کہ 17 اپریل کو چھتیس گڑھ کے دارالحکومت رائے پور کے نجی اسپتال میں آگ لگنے سے کورونا وائرس سے متاثر پانچ مریضوں کی موت ہوئی تھی۔