جنوبی کینرا میں 3بچوں سمیت 17افراد کی رپورٹ پوزیٹیو۔ جملہ متاثرین کی تعدادہوگئی 182
منگلورو،8/جون (ایس او نیوز)ضلع ڈپٹی کمشنر سندھو بی روپیش کی طرف سے کل اتوار کے دن جاری کیے گئے اعداد و شمار کے مطابق جنوبی کینرا میں کووِڈ کے 17نئے معاملات سامنے آئے جن میں تین بچے بھی شامل ہیں۔اس طرح اب تک متاثر ہونے والوں کی تعداد بڑھ کر 182ہوگئی ہے۔
اب جن لوگوں کی رپورٹ پوزیٹیو آئی ہے ان میں سے16افراد مہاراشٹرا سے واپس لوٹے ہیں، جبکہ ایک شخص گوا سے لوٹا ہے۔ ممبئی اور گوا سے لوٹے ہوئے لوگوں کو اڈپی میں کوارنٹین کیا گیا تھا۔ مقررہ میعاد پوری ہونے پر 11فرادموڈبیدری اور بقیہ چار بیلتنگڈی میں چلے آئے تھے۔ لیکن اب ان کے گلے کے سیمپل کی جانچ رپورٹ پوزیٹیو آئی ہے جس کے بعد ان سب کو وینلاک اسپتال میں علاج کے لئے داخل کیا گیا ہے۔
اس دوران کووِڈ سے متاثرہ دیگر 5افراد پوری طرح صحت یاب ہوگئے ہیں اور ان سب کو اسپتال سے ڈسچارج کردیا گیا ہے۔جس کے بعد جنوبی کینرا میں کورونا سے چھٹکارا پانے والوں کی کل تعداد 96ہوگئی ہے، جبکہ تاحال 89مریض مختلف اسپتالوں میں زیر علاج ہیں۔