کورونا اَپ ڈیٹ: جنوبی کینرا میں 17 اور اڈپی میں 22نئے پوزیٹیو معاملات۔ جملہ متاثرین کی تعداد جنوبی کینرا میں241۔اڈپی میں ہوگئی 990
منگلورو،13؍جون (ایس او نیوز) پچھلے دو دنوں سے اڈپی میں ایک بھی نیا پوزیٹیو معاملہ دیکھنے کو نہیں ملاتھا، جس سے سمجھا جارہاتھا کہ کووِڈ کی رفتار پر اڈپی میں کچھ لگام لگ گئی ہے۔لیکن جمعہ کے دن شام کوضلع انتظامیہ کی جانب سے جاری کردہ ہیلتھ بلیٹین کے مطابق اڈپی ضلع میں پھر 22نئے پوزیٹیو کیس سامنے آئے ہیں اوریہاں جملہ متاثرین کی تعداد 990ہوگئی ہے۔
جبکہ جنوبی کینرا میں کووِڈ سے متاثر ہونے کے 17نئے معاملے سامنے آئے ہیں جن میں سے 14افرد سعودی عربیہ سے لوٹے ہوئے ہیں جبکہ تین مہاراشٹرا سے لوٹے ہوئے افراد ہیں۔اس کے بعد وہاں پر جملہ متاثرین کی تعداد241ہوگئی ہے۔ ان میں سے فی الحال 105معاملے ایکٹیو ہیں اور جمعہ کے دن ڈسچارج ہونے والے 4افراد سمیت129لوگ صحت یا ب ہوچکے ہیں۔ اب تک جنوبی کینرا میں کووِڈ کی وجہ سے 7افراد موت کا شکار ہوگئے ہیں۔اس وقت ایک پچاس سالہ شخص آئی سی یو میں داخل ہے اور اس کی حالت نازک بنی ہوئی ہے۔جمعہ کے دن 25لوگوں کو نگرانی کے لئے اسپتال میں داخل کیا گیا ہے۔جبکہ سانس کی شدیدتکلیف(SARI) والے 27مریض اسپتال میں لائے گئے ہیں۔
اڈپی ضلع میں جمعہ کے دن پوزیٹیو نکلنے والے 22معاملوں میں 14مرد اور 8خواتین شامل ہیں جن میں سے جملہ 21افراد مہاراشٹرا سے لوٹے ہوئے ہیں۔جبکہ ایک مریض ایسا ہے جو پچھلے دنوں کووِڈ پوزیٹیو نکلنے والے لیاب ٹیکنی شین کے رابطے میں آیاتھا اور اب وہ خود پوزیٹیو ہوگیا ہے۔جمعہ کے دن 63 افراد نے 28دن کی کوارنٹین کی مدت پوری کرلی ہے۔ فی الحال 456افراد ہوم کوارنٹین اور 18لوگ سرکاری نگرانی والے مراکز میں کوارنٹین کئے گئے ہیں۔ جبکہ ایک ہائی رِسک مریض کو اسپتال کے اندر کوارنٹین کیاگیا ہے۔
اسی طرح جمعہ کے دن 14نئے لوگوں کو نگرانی کے لئے اسپتال میں لایا گیا ہے جس سے آبزرویشن میں رکھے گئے افراد کی تعداد 80ہوگئی ہے۔ان میں سے تین کووِڈ کے مشتبہ مریض ہیں،9سانس کی شدید تکلیف والے اور 2انفلوئنزا جیسی علامات کے مریض ہیں۔جمعہ کے دن 12لوگوں کو اسپتالوں کے آبزرویشن وارڈس سے ڈسچارج کیا گیا ہے۔جبکہ 31مریضوں کو صحت یاب ہونے پر اسپتال سے ڈسچارج کردیا گیا ہے۔اب تک کووِڈ کی وجہ سے ضلع اڈپی میں ایک مریض کی موت واقع ہوگئی ہے۔