بھٹکل 5 مئی (ایس او نیوز)  ملک بھر میں جس طرح کورونا کی دوسری لہر میں  حالات دگرگو ہورہے ہیں، بھٹکل میں  بھی  کورونا کے معاملات بڑھتے نظر  آرہے ہیں، جس سے عوام میں تشویش پائی جارہی ہے۔

محکمہ ہیلتھ کی جانب سے جاری کردہ پریس ریلیز کے مطابق  آج بدھ کو ایک ہی دن بھٹکل میں 19 کی رپورٹ پوزیٹیو آئی ہے جس کے ساتھ ہی  بھٹکل میں جملہ کورونا    پوزیٹو (ایکٹیو کیسس) کی تعداد 160 کو پہنچ گئی ہے۔راحت کی خبر یہ ہے کہ  تقریباً تمام لوگ  صحت مند ہیں اور زیادہ تر لوگوں میں  کورونا کی کوئی علامات پائی نہیں گئی ہے، یا بے حد کم پائی گئی ہیں۔ 

بھٹکل سرکاری اسپتال کے ذرائع  نے بتایا کہ  فی الحال بھٹکل سرکاری اسپتال کے کووڈ سینٹر میں 28 لوگ ایڈمٹ ہیں جس میں سے  14 مریضوں کو اکسیجن بیڈ فراہم کیا گیا ہے، دو آئی سی یو میں ہیں جبکہ 12 مریضوں کا عام بیڈ پر علاج  ہورہا ہے، اسی کے ساتھ آج کووڈ میں مبتلا ایک  45 سالہ خاتون کی موت  واقع ہوئی ہے۔ جس کے ساتھ ہی کورونا کی دوسری لہر میں  بھٹکل میں کووڈ سے مرنے والوں کی تعداد بڑھ کر پانچ ہوگئی ہے۔  جس میں  دو   سرسی کے لوگ بھی شامل ہیں۔

بھٹکل میں ویکسین  ختم:     کورونا ویکسین لگوانے کے لئے آج بھٹکل سرکاری اسپتال میں  جو لوگ آئے تھے، اُنہیں آج ناکام لوٹنا پڑا کیونکہ اسپتال حکام نے اُنہیں بتایا کہ  اسپتال میں ویکسین کا اسٹاک ختم ہوچکا ہے۔ 

بھٹکل میں اکسیجن وافر مقدار میں موجود:   بھٹکل میں اکسیجن  وافر مقدار میں موجود ہے اور اکسیجن کی کوئی کمی نہیں ہے۔ سرکاری طور پر جاری کی گئی ریلیز میں بتایا گیا ہے کہ سرکاری اسپتال میں اس وقت اکسیجن کے  26 جمبو سلینڈر  موجود ہیں ۔

بھٹکل اسپتال میں 34 اور کووڈ سینٹر میں  48 بیڈ دستیاب:   پریس ریلیز کے مطابق  بھٹکل سرکاری اسپتال کے کووڈ سینٹر میں 34 بیڈ اور  سونارکیری میں قائم کووڈ کیئر سینٹر میں 48 بیڈ دستیاب ہیں۔

ماسک  نہ پہنے پر جرمانہ:  آج بدھ کو ماسک نہ پہننے والے 14 لوگوں سے  جملہ  1800 روپیہ جرمانہ وصول کیا گیا، اس طرح ماسک نہ پہننے پر اب تک  بھٹکل تعلقہ انتظامیہ نے 48400 روپیہ جرمانہ وصول کیا ہے۔