منڈیا 29/اکتوبر(ایس او نیوز) منڈیا میں واقع ایک گنّے کے کھیت میں پاپولر فرنٹ آف انڈیا کی طرف سے منعقد کی گئی ایک پریڈ کو مشکوک حرکت قرار دیتے ہوئے پولیس نے پی ایف آئی سے تعلق رکھنے والے 16نوجوانوں کو گرفتار کرلیا جنہیں بعد میں عدالت سے مشروط ضمانت پررہائی مل گئی۔

 موصولہ تفصیلات کے مطابق اس پریڈ کی قیادت ہنسور کے رہنے والے مبارک پاشاہ نے کی تھی اوراس میں کے آر پیٹ کے9، المباڈی کے5 اور ہنسور کے رہنے والے 2 نوجوان شامل تھے۔پولیس کا کہنا ہے کہ کھلے میدان اور عام جگہ سے ہٹ کر ایک گنّے کے کھیت میں پریڈ منعقد کرنا شکوک پید اکررہا ہے۔ اس لئے اس پریڈ کا مقصد اور یہاں دی جانے والی تربیت کے تعلق سے گہری تفتیش ضروری ہوگئی ہے جسے پولیس انجام دے رہی ہے۔پولیس کا یہ بھی کہنا ہے کہ اس نے پریڈ کے مقام کی پوری طرح جانچ پڑتال کی ہے اور اب تک اسے کسی بھی قسم کی قابل اعتراض چیز، ہتھیار یا تخریبی کارروائی میں استعمال میں ہونے والی کسی چیزیا کتابچے وغیرہ کا پتہ نہیں چلا ہے۔

 کے آر پیٹ عدالتی کامپلیکس میں اس وقت الجھن اورتناؤ کی صورت پیدا ہوگئی جب پیر کے دن چند مقامی وکلاء، آر ایس ایس، دیگر سنگھ پریوار کی تنظیموں سے تعلق رکھنے والے کارکنان کنڑا ایکٹیوسٹ اور کچھ مقامی افراد نے پی ایف آئی کی عدالت میں پیروی کے لئے بنگلورو سے پہنچی ہوئی وکلاء کی ٹیم کے خلاف اعتراض جتایا اور اس بات پر اڑے رہے کہ گرفتار کیے گئے افراد پر لگائے گئے الزامات معمولی نہیں ہیں، اس لئے کسی کو بھی عدالت میں ملزمین کی پیروی یا پھر حمایت بھی نہیں کرنا چاہیے۔کچھ دیر کی کشیدگی کے دوران ضمانت کی عرضی داخل کرنے کے لئے بنگلورو سے پہنچی ہوئی وکلاء کی ٹیم پولیس کے تحفظ میں عدالت کے اندر داخل ہوئی۔جس کے بعد عدالت نے ملزمین کو مشروط ضمانت پر رہا کردیا۔

اسی دن شام کے وقت اخباری نمائندوں سے خطاب کرتے ہوئے بجرنگ دل کے ذمہ داران نے اعلان کیا کہ جمعرات کے دن منڈیا میں سنگھ پریوار کی طرف سے بند منایا جائے گا۔