ویزا قوانین کی خلاف ورزی کے مجرم پائے گئے 150 ہندوستانی، امریکہ نے واپس بھیجا
نئی دہلی،20/نومبر(ایس او نیوز/آئی این ایس انڈیا) آج صبح 6 بجے ایک خصوصی طیارے سے 150 ہندوستانیوں کو امریکہ نے واپس ہندوستان بھیج دیا۔یہ تمام امریکی تحقیقات میں یا تو ویزا قوانین کی خلاف ورزی کرتے پائے گئے یا پھر امریکہ میں غیر قانونی طریقے سے داخل ہوئے تھے۔تمام ہندوستانیوں کو دستاویزات کی جانچ کی جا رہی ہے۔ذرائع کے مطابق یہ تمام ہندوستانی صبح 6 بجے خصوصی طیارے سے بنگلہ دیش سے ہوتے ہوئے ہندوستان پہنچے۔صبح 6 بجے تمام ہندوستانی شہریوں کو خصوصی طیارے نے نئی دہلی ہوائی اڈے کے ٹی 3 ٹرمینل پر اتارا۔غور طلب ہے کہ حال ہی میں ایسے ہی الزامات کی بنیاد پر میکسیکو نے بھی تقریبا 300 ہندوستانیوں کو واپس ہندوستان بھیج دیا تھا۔معلومات کے مطابق، میکسیکو سے ہندوستانی شہری امریکہ جانے کے فراق میں تھے۔ تمام 300 ہندوستانیوں کو میکسیکن ریاستوں اوکساکا، باجا کیلی فورنیا، ویراکروج، چیاپاس، سونورا، میکسیکو سٹی، ڈرنگو اور تبسکو میں کئی ماہ کے دوران پکڑا گیا تھا۔میکسیکن حکام کا الزام تھا کہ یہ ہندوستانی غیر قانونی طور پر امریکہ میں داخل ہونے کے لئے گزشتہ چند ماہ میں میکسیکو پہنچے تھے۔