ریاست میں 15لاکھ سے زائد کسانوں کے قرضے معاف
بنگلورو،7/مئی(ایس او نیوز) وزیر اعلیٰ ایچ ڈی کمار سوامی کی طر ف سے ریاست میں کسانوں کے قرضے معاف کرنے کے اعلان پر عمل کرتے ہوئے بجٹ میں رقم بھی مہیا کرادی گئی اور بڑی تعداد میں کسانوں کے قرضوں کو معاف کرنے کا عمل بھی شروع ہوگیا۔اس عمل کو مزید آگے بڑھاتے ہوئے ریاستی حکومت نے کوآپریٹیو اور تجارتی بینکوں میں قرضے حاصل کرنے والے 15.5لاکھ کسانوں کے قرضے معاف کرنے کے لئے اب تک 7417 کروڑ روپیوں کی رقم جاری کردی ہے۔ ریاستی حکومت کی طرف سے دی گئی معلومات کی بنیاد پر تجارتی بینکوں سے زرعی قرضے حاصل کرنے والے 7.49 لاکھ کسانوں کے قرضے جن کی مجموعی رقم 3929 کروڑ روپئے ہے معاف کردی گئی ہے۔ اس کے علاوہ باقی کسانوں کی رقم معاف کرنے کے لئے بھی فوری کارروائی کی جارہی ہے۔ لوک سبھا انتخابات کی تاریخوں کے اعلان اور 23 مئی تک ضابطہئ اخلاق کا نفاذ کے سبب قرضوں کے معافی کا عمل تعطل کا شکار ہوچکا ہے، اب 23 مئی کو ووٹوں کی گنتی کے فوراً بعد انتخابی ضابطہئ اخلاق کا اطلاق از خود ختم ہوجائے گا، جس کے فوراً بعد ریاستی حکومت کی طرف سے کسانوں کے قرضوں کی معافی کے لئے مزید رقم جاری کی جائے گی۔ سرکاری ذرائع نے بتایا ہے کہ انتخابی نتائج کے فوراً بعد ریاستی حکومت 1.5لاکھ کسانوں کے کھاتوں میں تقریباً 9سو کروڑ روپیوں کی رقم جمع کرائے گی۔ اسی طرح کوآپریٹیو شعبوں میں قرضے حاصل کرنے والے 8.1لاکھ کسانوں کے قرضوں کی معافی کے لئے بھی الگ سے رقم منظور کئے جانے کے قوی امکانات ہیں۔