گجرات میں کورونا وائرس انفیکشن سے 14 ماہ کے بچے کی موت
جام نگر،8؍اپریل (ایس او نیوز؍ایجنسی) کورونا وائرس انفیکشن کی وجہ سے گجرات میں سب سے کم عمر بچے کی موت کا معاملہ پیش آیا ہے۔ بتایا جاتا ہے کہ جام نگر میں کورونا وائرس کی وجہ سے 14 ماہ کے ایک بچے کی موت ہو گئی ہے۔ محکمہ صحت کےا فسران کا کہنا ہے کہ جب اس بچے کو اسپتال لایا گیا تھا تو حالت کافی سنگین تھی اور بچے کو وینٹی لیٹر پر رکھا گیا تھا اور اسے بچانے کی ہر ممکن کوشش کی گئی لیکن وہ بچ نہیں سکا۔
میڈیا ذرائع میں آ رہی خبروں کے مطابق بچے کے والدین کا تعلق اتر پردیش سے ہے جو گجرات کے کارخانوں میں بطور مزدور کام کرتے ہیں۔ انھوں نے کافی عرصہ سے کوئی سفر بھی نہیں کیا ہے اس لیے انتظامیہ کے لیے یہ پتہ لگانا مشکل ہو رہا ہے کہ آخر بچے میں کورونا انفیکشن ہوا کیسے۔ والدین میں بھی کورونا کی کوئی علامت دیکھنے کو نہیں مل رہی ہے، اس کے باوجود دونوں کو ضروری احتیاط برتتے ہوئے کوارنٹائن کے لیے بھیج دیا گیا ہے۔ جام نگر علاقے میں جس گاؤں میں یہ مزدور جوڑا رہتا تھا، اسے احتیاطاً پوری طرح سے بند کر دیا گیا ہے۔
بچے کے تعلق سے ایک سرکاری نوٹیفکیشن میں بتایا گیا ہے کہ اسے طبیعت خراب ہونے پر جام نگر کے ایک سرکاری اسپتال میں داخل کرایا گیا تھا۔ اس کی حالت کافی خراب تھی اور دو دن قبل ہی بچے میں کورونا انفیکشن کی تصدیق ہوئی تھی۔ ڈاکٹروں کا کہنا ہے کہ وائرس انفیکشن کی وجہ سے بچے کے کئی اعضاء نے کام کرنا بند کر دیا اور بالآخر اس کی موت ہو گئی۔
قابل ذکر ہے کہ پورے جام نگر ضلع میں اب تک بچے میں کورونا وائرس انفیکشن کا یہ پہلا معاملہ تھا۔ گجرات میں اس بچے میں سب سے کم عمر میں کورونا انفیکشن کا پتہ چلا تھا۔ چونکہ کمزور قوت مدافعت والے لوگوں پر کورونا کا زیادہ اثر ہوتا ہے، یہی وجہ ہے کہ اس بچے کی جان نہیں بچائی جا سکے۔