بھٹکل،26 / جنوری (ایس او نیوز) بھٹکل تعلقہ انتظامیہ، تعلقہ لیگل سروس کمیٹی، تعلقہ بار ایسو سی ایشن، ڈپارٹمنٹ آف پراسیکیوشن اور محکمہ پولیس کے اشتراک سے دی نیو انگلش پی یو کالج میں 'نیشنل ووٹرس ڈے' کا انعقاد ہوا۔ 
    
پروگرام افتتاح جے ایم ایف سی  سینئرسوِل جج کانتا کورنی نے کہا کہ ووٹنگ کا مطلب جمہوری ملک کی بنیاد ہوتا ہے ۔ مالدار اور غریب دونوں کے ووٹ کی قیمت ایک ہی ہوتی ہے ۔ نوجوان نسل کو مستقبل کے اس ورثہ کی اہمیت کو سمجھنا ہوگا ۔ ووٹروں کو کسی بھی قسم کے لالچ کا شکار نہیں ہونا چاہیے ۔ جے ایم ایف سی کے چیف سوِل جج ونود بالا نائک نے کہا کہ ایک صحت مند سماج کی تعمیر کے لئے ووٹنگ لازمی ہوتی ہے۔ 
    
پروگرام کی صدارت کرتے ہوئے اسسٹنٹ کمشنر ممتا دیوی نے کہا ووٹنگ کے مماثل کوئی بھی چیز نہیں ہوتی ہے ۔ ووٹنگ پانچ منٹ کام ہوتا ہے مگر اس کے لئے بہت زیادہ تیاریاں کرنی پڑتی ہیں ۔ لہٰذا تمام ووٹرس کو اپنے حق کا استعمال کرتے ہوئے ووٹنگ میں شامل ہونا چاہیے ۔ بھٹکل تحصیلدار نے افتتاحی خطاب کیا ۔ بھٹکل بار ایسو سی ایشن کے صدر پانڈو نائک نے اپنے خیالات کا اظہار کیا ۔ تعلقہ پنچایت سی ای او نے ووٹنگ سے متعلق ضروری نکات پیش کیے ۔ دی نیو انگلش پی یو کالج  کے پروفیسر شیوانند بھٹ نے ووٹ کی قدر و اہمیت پر خطاب کیا۔ 
    
اس موقع پر تقریری مقابلے ، کوئز اور دیگر مختلف مقابلوں میں کامیاب ہونے والوں کو انعامات سے نوازا گیا ۔ نئے ووٹرس کو شناختی کارڈ بھی تقسیم کیے گئے۔