بارش سے نقصانات راحت کاری کیلئے 130کروڑ جاری: آراشوک
بنگلورو، 22؍نومبر (ایس او نیوز) ریاستی وزیر برائے محصولات آر اشوک نے بتایا کہ ریاست میں بارش سے نقصان کا سامنا کررہے علاقوں میں فوری راحت کاری کیلئے 130کروڑ روپئے جاری کئے گئے ہیں۔
ودھان سودھا میں اخباری نمائندوں سے بات کرتے ہوئے اشوک نے یہ جانکاری دی اور کہا کہ سیلاب زدہ علاقوں میں فوری طور پرراحت کاری کے کاموں کو شروع کرنے افسروں کو ہدایت دی گئی ہے۔
انہوں نے کہا کہ اگر کہیں بارش کی وجہ سے گھر بیٹھ گیا ہو تو فوراً 10ہزار روپئے ادا کرنے ہدایت دی گئی ہے اورمعاوضہ ادا کرنے میں تاخیر نہ کرنے کی تاکید کی گئی ہے۔
انہوں نے کہا کہ ریاست میں اچانک بارش کی وجہ سے مختلف مقامات پر بھاری نقصان ہوا ہے، اس سلسلہ میں ضلع ڈپٹی کمشنر،سی ایاو اورمحکمہ محصولات کے افسروں کو سروے کرنے کی ہدایت دی گئی ہے۔ کافی کاشتکاروں کو معاوضہ ادا کرنے کے سلسلہ میں اشوک نے بتایا کہ مرکزی حکومت کومکتوب روانہ کیا جائے گا۔
انہوں نے بتایا کہ بارش کی وجہ سے اولڈ میسور علاقہ اور بیلگاوی،شمالی کرناٹک،ہاسن،میسور، اور منڈیا میں راگی کی فصل کو شدید نقصان پہنچا ہے۔