منگلورو میں ڈینگی بخار سے ایک طالبہ ہلاک
منگلورو،20/جولائی (ایس اونیوز) منگلورو میں ڈینگی بخار کے بڑھتے معاملات کے ساتھ ایک اور اسکولی طالبہ کی موت واقع ہو گئی ہے، جبکہ گزشتہ چند روز قبل تیز بخار کی وجہ سے ایک سات سالہ لڑکے کی موت ہوئی تھی جس کے بارے میں شک ظاہر کیا گیا تھا کہ اس کو بھی ڈینگی بخار ہواتھا۔ لیکن محکمہ صحت کے ہیلتھ آفیسر نے اس بات کی تردید کی تھی اور اس لڑکے کی موت کی وجہ قلب کے عضلات میں انفیکشن بتایا تھا۔
اب تازہ معاملے میں جیپو مورگن گیٹ کے رہنے والے کشور شیٹی کی بیٹی شاردا شیٹی (12سال) کی موت واقع ہوئی ہے جس کا علاج ایک نجی اسپتال میں چل رہا تھا۔ شاردا شیٹی شہر کے جیروسا پرائمری اسکول میں ساتویں جماعت کی طالبہ تھی۔اس کی بڑی بہن کوبھی ڈینگی بخار کی وجہ سے اسپتال میں داخل کیا گیا تھااور صحت یاب ہوکر گھر لوٹی تھی۔ لیکن دو ہفتے بعد بھی شاردا پرعلاج کارگر نہیں ہوا۔ منگل کی شب میں وہ کوما میں چلی گئی اورجمعرات کے دن اس نے دم توڑ دیا۔
شاردا کی موت کے خبر عام ہونے کے بعد اس کے اسکول میں بچوں کو چھٹی کا اعلان کیا گیا۔ ضلع ڈپٹی کمشنر شسی کانت سینتھل، ایم سی سی کے کمشنرمحمد نذیر اور دیگر سرکاری افسران نے شاردا کے گھر پہنچ کر تعزیت کرنے کے علاوہ اس علاقے میں صفائی ستھرائی اور مچھروں کی افزائش سے متعلق جائزہ لینے اور مناسب اقدامات کرنے کے احکام جاری کیے۔