بنگلورو میں 110طلباء کے لئے دوبارہ نیٹ امتحان کا اہتمام
بنگلورو، 21مئی (ایس او نیوز) 5مئی کو ملک بھر میں میڈیکل کورسوں میں داخلوں کے لئے کروائے گئے امتحانات کے موقع پر ہمپی ایکسپریس کی بنگلور آمد میں سات گھنٹوں کی تاخیر کے سبب 500 سے زائد طلبا امتحان سے محروم ہوگئے تھے، وزیر اعلیٰ ایچ ڈی کمار سوامی، سابق وزرائے اعلیٰ سدرامیا، یڈیورپا، اور ساؤتھ ویسٹرن ریلوے کے عہدیداروں کی گزارش پر مرکزی وزیر برائے فروغ انسانی وسائل پرکاش جاؤڈیکر نے اس معاملے میں مداخلت کی جس کے بعد نیٹ امتحان منظم کرنے والی نیشنل ٹیسٹنگ اتھارٹی نے ان طلبا کو دوبارہ امتحان لکھنے کی اجازت دی۔ ان طلباء پر یہ پابندی لگائی گئی تھی کہ وہ جس ٹرین میں تاخیر ہوئی تھی اس کا ٹکٹ دکھا کر دوبارہ امتحان کا ہال ٹکٹ حاصل کرسکتے ہیں۔اس بنیاد پر کئی طلبا ء نے دوبارہ امتحان کے لئے درخواست دی آج شہر کے بی بی یو ایل جین کالج کے مرکز میں امتحان کا اہتمام کیا گیا۔ امتحان کے لئے 500 میں سے 110 طلباء نے اپنا نام درج کروایاتھا، آج صبح دس سے دوپہر ایک بجے تک یہ امتحان کروایا گیا۔