اڈپی6/اپریل (ایس اونیوز) اڈپی ضلع کے ہیلتھ آفیسر سدھیر چندرا سوڈ نے بتایا کہ کورونا وائرس سے متاثر ہونے کے شبہ کی وجہ سے اتوار کے دن کُل 11افراد کے گلے سے حاصل کیے گئے نمونے شیموگہ لیباریٹری میں جانچ کے لئے بھیجے گئے ہیں۔

ڈی ایچ او کے بیان کے مطابق اتوار کے دن ضلع کے مختلف اسپتالوں میں پانچ افراد داخل ہوئے ہیں ا ن میں 3مرد کورونا وائرس سے متاثر ہونے کا شک ہے۔جبکہ بقیہ2افرادسانس کی تکلیف کی وجہ سے اسپتال میں داخل ہوئے ہیں۔کورونا سے براہ راست متاثر ہونے کے شبہ میں 3،متاثرہ افراد سے رابطہ کے شک میں 7اورسانس لینے میں دشواری محسوس کرنے والے ایک شخص کا سیمپل حاصل کیاگیا اور جانچ کے لئے روانہ کیا گیا ہے۔ایک دو دن میں اس کی رپورٹ آنے کی توقع ہے۔

 ڈاکٹر سوڈ کے مطابق اتوار کے دن 41افراد کی رپورٹ متوقع تھی، مگر صرف12معاملوں کی رپورٹ موصول ہوئی اور تمام رپورٹس نگیٹیو نکلی ہیں۔ بقیہ 29اورتازہ 11نمونوں کے ساتھ جملہ 40افراد کی رپورٹ ابھی آنا باقی ہے۔ضلع اڈپی سے اب تک 233افراد کے نمونے بھیجے گئے تھے اس میں سے 190افراد کی رپورٹ نگیٹیو آئی ہے اور صرف 3رپورٹس پوزیٹیو آئی ہیں۔