کرناٹکا میں ایک ہزار سرکاری اسکولوں میں انگلش میڈیم تعلیم کا حکمنامہ جاری؛ 100 پبلک اسکولوں کے قیام کی فہرست بھی منظر عام پر
بنگلورو۔21/مئی(ایس او نیوز) نجی اسکولوں کے معیار تعلیم کی مسابقت کرنے کے مقصد سے ریاستی حکومت نے سال رواں سے ایک ہزار سرکاری اسکولوں میں انگلش میڈیم تعلیم شروع کرنے کے احکامات جاری کردئے ہیں۔ محکمہ تعلیمات عامہ کی جانب سے جاری نوٹی فکیشن کے مطابق رواں تعلیمی سال سے ہی ریاستی حکومت کی طرف سے 100 پبلک اسکول اور پری پرائمری اسکول شروع کئے جارہے ہیں۔
ان اسکولوں کی شروعات تمام اسمبلی حلقوں میں کی جائے گی محکمہ تعلیمات نے اس کے لئے تمام انتظامات پورے کرلئے ہیں۔ نوٹی فکیشن میں بتایا گیا ہے کہ 176تعلقہ جات میں رواں سال ہی ایک ہزار انگلش میڈیم اسکول قائم کئے جائیں گے۔وزیراعلیٰ ایچ ڈی کمار سوامی نے مخلوط حکومت کے بجٹ کے دوران اعلان کیا تھا کہ وہ ریاست میں ایک ہزار انگریزی میڈیم اسکول شروع کریں گے۔حالانکہ کنڑا ادیبوں، مصنفین اور دیگر حلقوں سے حکومت کے اس فیصلے کی مخالفت کی گئی ہے۔ وزیراعلیٰ پر الزام لگایا گیا کہ وہ اپنے اس فیصلے سے وہ ریاست کی علاقائی زبان کو نقصان پہنچارہے ہیں۔ان تمام کی پرواہ کئے بغیر حکومت کی طرف سے آج ایک ہزار انگلش میڈیم اسکولوں کو شروع کرنے کے لئے نوٹس جاری کردیا گیا۔
ہر اسمبلی حلقے میں چار انگلش میڈیم اسکول کے حساب سے قیام عمل میں آئے گا۔ اس بات پر بھی توجہ دی گئی ہے کہ ہر اسکول کے کیمپس میں پہلی سے دسویں جماعت تک کی تعلیم کا انتظام بیک وقت کیاجائے۔ ان اسکولوں کے لئے انگریزی نصاب کی تیاری کا عمل بھی آگے بڑھایا گیا ہے، ساتھ ہی ایک ہزار اساتذہ کے تقرر کا عمل بھی شروع کردیا گیا ہے۔ جن اساتذہ کو ان اسکولوں کے لئے مقرر کیا جائے گا انہیں پندرہ دن کی خصوصی تربیت دی جائے گی۔ ایک ہزار انگلش میڈیم اسکول کھولنے کے علاوہ حکومت سو پبلک اسکول بھی کھولنے کا ارادہ کرچکی ہے۔ان میں سے چھ اسکول باگلکوٹ، چھ بلگاوی، پندرہ بنگلور نارتھ، گیارہ بنگلور ساؤتھ، 27 / بیدر، چار چکمگلور، تین دکشن کنڑا، دس داونگیرے، 16 دھارواڑ، پندرہ رائچور، بارہ رام نگرم، چھ شیموگہ 24ٹمکور، اڈپی تین، شمالی کینرا 9 اور بیجاپور میں 18اسکول قائم کئے جائیں گے۔