مدھیہ پردیش میں دس سالہ بچی کے ساتھ آبروریزی کے بعد قتل کی اندوہناک واردات ؛ گوبر گیس پلانٹ سے ملی لاش
بھوپال، 4 مارچ (ایس او نیوز؍آئی این ایس انڈیا) مدھیہ پردیش کے کٹنی ضلع میں ایک 10 سالہ بچی سے آبروریزی کے بعد اس کا قتل کر دینے کا معاملہ سامنے آیا ہے۔واقعہ کے سامنے آنے کے بعد پولیس نے نامعلوم افراد کے خلاف مقدمہ درج کرکے تحقیقات شروع کر دی ہے۔ ایڈیشنل پولیس سپرنٹنڈنٹ سندیپ مشرا نے اتوار کو بتایا کہ کھتولی پولیس چوکی علاقے کے ایک گاؤں میں 10 سالہ ایک لڑکی اپنے گھر سے 28 فروری کی شام نکلی تھی اور رات تک واپس گھر نہیں لوٹی۔یکم مارچ کو رشتہ داروں نے اس کی تلاش شروع کی، لیکن وہ نہیں ملی۔انہوں نے بتایا تھا کہ ہفتہ کو ایک گوبر گیس پلانٹ کے ٹینک سے لڑکی کی لاش برآمد کی گئی۔
مشرا نے بتایا کہ پہلی نظرمیں یہ ظاہر ہوتا ہے کہ لڑکی سے بدفعلی کرنے کے بعد اس کا گلا گھونٹ کر قتل کیا گیا۔افسر نے بتایا کہ پولیس نے نامعلوم ملزم کے خلاف تعزیرات ہند کی مختلف دفعات اور پاسکو قانون کے تحت مقدمہ درج کیا ہے،پولیس معاملے کی تحقیقات کر رہی ہے۔بتا دیں کہ ایم پی میں اس طرح کا یہ کوئی پہلا واقعہ نہیں ہے۔اس سے پہلے مدھیہ پردیش میں 4 سال کی بچی کے ریپ کے مجرم ونود کی پھانسی کی سزا پر سپریم کورٹ نے عبوری روک لگا دی تھی۔کورٹ نے مجرم ونود کی درخواست پر مدھیہ پردیش حکومت کو نوٹس جاری کر تے ہوئے جواب مانگا تھا۔ اسی سال 9 اگست کو مدھیہ پردیش ہائی کورٹ نے مجرم ونود کی پھانسی کی سزا برقرار رکھی تھی۔ونود نے 13 مئی 2017 کو 4 سال کی بچی کے ساتھ ریپ کیا تھا اور بعد میں اس کا قتل کردیاتھا۔ ونود کو شکڈول کی نچلی عدالت نے اسی سال 28 فروری کو پھانسی کی سزا سنائی تھی،جس کے خلاف ونود نے ہائی کورٹ میں عرضی داخل کی تھی۔ہائی کورٹ نے بھی پھانسی کی سزا کو برقرار رکھا تھا۔