بنگلورو، 30؍اپریل (ایس او نیوز) ایسا لگ رہا تھا کہ بنگلورو میں رفتہ رفتہ کورونا وائرس کا پھیلاؤ قابو میں آرہا ہے اور بنگلورو میں متاثرین کی تعداد گھٹ رہی ہے۔ لیکن اسی دوران بنگلورو میں ان وارڈوں کی تعداد میں اچانک اضافہ ہوگیا جن کو بی بی ایم پی نے کورونا وائرس کے پھیلاؤ کے لئے ہاٹ اسپاٹ قرار دیا ہے۔ ان وارڈوں کو کنٹین منٹ زون قرار دیا ہے۔ ان وارڈوں کو کنٹین منٹ زون قرار دے کر انہیں چاروں طرف سے بند کردیا گیا ہے۔علاقوں میں لاک ڈاؤن کے ضابطہ کو سختی سے نافذ کیا جائے گا۔

بی بی ایم پی کی طرف سے 14؍اپریل کو ترتیب دی گئی ہاٹ اسپاٹ وارڈوں کی فہرست میں بنگلورو کے 38 وارڈ شامل تھے۔ اس کے بعد کورونا وائرس کے واقعات میں مسلسل کمی کے بعد ان میں کمی آتی گئی اور یہ علاقہ گھٹ کر 32 تک جا پہنچے تھے تاہم اب اچانک اس میں اضافہ ہوگیا ہے اور پہلی بار ہاٹ اسپاٹ والے وارڈوںکی تعداد 42 تک جاپہنچی ہے۔  

بی بی ایم پی کی طرف سے جاری تازہ فہرست کے مطابق ان وارڈوں میں بیاٹ رائن پورا، ہمپی نگر ، پلکیشی نگر، ناگپور اور پائر سندرا وارڈ شامل ہیں۔بی بی بی ایم پی کے افسروں نے بتایا کہ جن وارڈوں میں ہاٹ اسپاٹ موجود ہیں ان تمام کو مکمل طور پر سیل ڈاؤن نہیں کیا جائے گا بلکہ جس علاقے سے کورانا وائرس پازیٹیو کا معاملہ سامنے آیا ان کو متاثرہ علاقہ قرار دے کر انہیں بند کیا جائے گا۔ بنگلورو میں فی الوقت  ایسے 26 مقامات کی نشاندہی کر کے انہیں مکمل طور پر سیل ڈاؤن نہیں کیا جائے گا بلکہ ان علاقوں کو بند کیا جائے گا جن کو ویسٹ زون میں آنے والے پادرائن پورہ اور بومن ہلی ڈیویژن میں آنے والے ہونگا سندرا وارڈ میں مجموعی طور پر 37 معاملے آئے  ہیں۔ اس لئے ان دونوں وارڈوں کو مکمل طور پر سیل ڈاؤن کر دیا گیا ہے۔

اس کے علاوہ بنگلورو کے کورونا متاثرین سے راست رابطے میں آنے والے افراد کو کوارنٹائن کیا گیا ہے۔ شہر کے پلکیشی نگر علاقے میں کنٹین منٹ زون بنائے جانے کے بارے میں مقامی کارپوریٹر اے آر ذاکر نے کہا کہ ان کے وارڈ میں آنے والے سینٹ جانس چرچ روڈ پر سفینہ گارڈن سے متصل گلیوں کو کنٹین منٹ زون قرار دیا گیا ہے حالانکہ اس علاقہ میں کوئی پازیٹیو کیس نہیں آیا ہے لیکن یہاں  شفاء اسپتال میں کام کرنے والی نرسوں کا ہاسٹل موجود تھا ۔ چونکہ  شفاء اسپتال میں کورونا وائرس سے متاثر ہونے والے ڈاکٹر سینل سے یہ نرسس راست رابطہ میں تھیں اس لئے انہیں کوارنٹائن کر کے ان کے ہاسٹل کو متاثرہ علاقہ قرار دیا گیا ہے اورآس پاس کی چند گلیوں کو بند کیا گیا ہے۔