کاسرگوڈ ضلع میں کووِڈ 19نے پھر اٹھایا سر۔ایک ساتھ 10معاملے سامنے آئے۔سماجی خدمت گار، طبی عملہ اور منتخب عوامی نمائندے بھی ہوئے شکار
کاسرگوڈ15/مئی(ایس او نیوز) بہت دنوں تک کورونا ہاٹ اسپاٹ رہنے کے بعد ابھی تین چار دن پہلے کاسرگوڈ ضلع کو کورونا فری قرار دیا گیا تھا۔ لیکن اتفاق سے 14/مئی کے دن پھر سے10 نئے معاملے سامنے آئے جس میں ایک ہی خاندان کے چار افراد، دو بچے اور طبی عملہ سے متعلق چار افراد، سماجی خدمت گار کے علاوہ منتخب عوامی نمائندے بھی شامل ہیں۔
ضلع کاسرگوڈ میں کووِڈ 19کی وباء نے تیسرے مرحلے میں ایک ساتھ بڑے پیمانے پر جو سر اٹھایا ہے اس سے سرکاری افسران اور محکمہ صحت کا درد سر بڑھ گیا ہے۔اب جو لوگ متاثر ہوئے ہیں اس میں کاسرگوڈ ضلع اسپتال اور کاسرگوڈ جنرل اسپتال کے عملے سے متعلق افراد بھی شامل ہیں۔
معلوم ہوا ہے کہ 4/مئی کو ممبئی سے لوٹنے والے شخص کو اپنی کار میں سوار کرکے لانے والے ایک سماجی خدمت گار،عوامی منتخب نمائندہ کے طور پر خدمات انجام دینے والی اس کی بیوی،اس کے 8اور11سالہ دو بچے بھی اس مرض کا شکار ہوگئے ہیں۔
