کمٹہ میں بس اور ٹمپو کی ٹکر؛ ایک جاں بحق، نو شدید زخمی؛ ٹمپو کے پرخچے اُڑگئے
بھٹکل 7/جولائی (ایس او نیوز) ضلع اُترکنڑا کے کمٹہ تعلقہ کے مضافاتی علاقہ مورابا نیشنل ہائی وے 66 پر ایک تیز رفتار بس اور ٹمپو کے درمیان ہوئی ٹکر میں ایک بچی جاں بحق ہوگئی جبکہ ٹمپو پر سوار قریب نو لوگ شدید زخمی ہوگئے جنہیں قریبی اسپتال میں ابتدائی طبی امداد کے بعد اُڈپی لے جایا گیاہے۔
مہلوک بچی کی شناخت چار سالہ دیپا شیوانند کی حیثیت سے کی گئی ہے جو ٹمپو میں اپنے والدین کے ساتھ سفر کررہی تھی۔
ذرائع نے بتایا کہ پرائیویٹ بس مینگلور سے ہبلی جارہی تھی جبکہ ٹمپو جس پر 12 لوگ سوار تھے، بادامی سے اُڈپی جارہی تھی، اتوار کو صبح کی اولین ساعتوں میں دونوں ایک دوسرے سے تیز رفتاری کے ساتھ ٹکراگئے۔ حادثے میں ٹمپو پر سوار دس لوگ شدید زخمی ہوئے تھے جنہیں قریبی اسپتال سے ابتدائی طبی امداد کے بعد اُڈپی لے جایا گیا تھا، بتایا گیا ہے کہ بچی اُڈپی ادرش اسپتال میں زخموں کی تاب نہ لاکر چل بسی۔
ٹکر میں ٹمپو کے پرخچے اُڑ گئے ہیں جبکہ بس کے اگلے حصے کو بھی نقصان پہنچا ہے۔
گوکرن پولس تھانہ میں حادثے کے تعلق سے معاملہ درج کیا گیا ہے اور پولس چھان بین کررہی ہے۔
