کیرالہ میں تیسرے مرحلے کی پولنگ کے دن مختلف مقامات پر10افراد ہوگئے فطری موت کا شکار
تھیرو اننت پورم 23؍اپریل (ایس او نیوز) کیرالہ میں 23اپریل کو ہوئی تیسرے مرحلے کی پولنگ کے موقع پر مختلف مقامات سے 10افراد موت کا شکار ہونے کی اطلاعات ملی ہیں۔
الیکشن کمیشن نے واضح کردیا ہے کہ ان اموات کاکسی قسم کے انتخابی تشدد سے کوئی تعلق نہیں ہے۔ ریاستی الیکشن پینل نے کاسرگوڈ، کنور، ایرناکولم، وائیناڈ ، کولم اور دیگر علاقوں کے ڈسٹرکٹ کمشنریٹس کو ہدایات جاری کی ہیں کہ ان اموات کے سلسلے میں اعداد وشمار کے ساتھ رپورٹ تیارکریں۔
فطری موت کاشکار ہونے والوں میں کوٹایم کی روسمّا (84سال) کے بارے میں معلوم ہوا ہے کہ جب وہ پولنگ بوتھ میں جانے کے لئے آٹو رکشہ میں داخل ہورہی تھی تو بے ہوش ہوکر گر پڑی اور اس نے دم توڑ دیا۔کنور میں ہوئی تین اموات میں سے ایک شخص وینو گوپال کے بارے میں بتایا جاتا ہے کہ اپنا ووٹ ڈالنے کے بعد جیسے ہی وہ گھر لوٹا تو بے ہوش ہوکر گرپڑا ۔ فوری طور پر اسے اسپتال لے جایا گیا ، مگر تب تک موت واقع ہوچکی تھی۔ تیلچیری کے مصطفیٰ (52سال) نے ایک پولنگ بوتھ کے اندر آخری سانس لی۔ جبکہ وجیا (65سال) نامی شخص کی موت اس وقت واقع ہوگئی جب وہ چوکلی پولنگ بوتھ پر قطار میں کھڑے ہوکر اپنی باری کا انتظار کررہاتھا۔
تھیریسیمّا(87سال) جب ایرناکولم کے ایک پولنگ بوتھ کے اندر پولنگ آفیسرسے اپنی ووٹنگ کی پرچی لے رہی تھی تواس کی روح پرواز کرگئی۔کولّم میں واقع ہونے والی اموات میں سے ایک 36سالہ شخص کے بارے میں معلوم ہوا ہے کہ پولنگ آفیسر سے بات چیت کررہا تھا تو اچانک اس نے بے چینی کی شکایت کی اور وہیں بے ہوش ہوکر گرتے ہی وہ فوت ہوگیا۔وائیناڈ میں جہاں سے کانگریس صدر راہل گاندھی انتخاب لڑرہے ہیں ، بالن (64سال) نامی ایک قبائلی کی موت ووٹ ڈالنے کے دوران ہوئی ہے جبکہ آلپّوزھامیں پربھاکرن (74سال) نامی ایک شخص پولنگ بوتھ جانے کے دوران راستے میں ہی فوت ہوگیا ۔ ایک اور شخص پولنگ کے لئے قطار میں اپنی باری کا انتظاکر تے ہوئے موت کا شکار ہوگیا جس کا نام پاپاچین (67سال) بتایا گیا ہے ۔ اسی طرح کاسرگوڈ کے ایک پولنگ بوتھ میں بھی ادھیڑ عمر کے بابو راج کی موت واقع ہونے کی خبر ہے۔