بھٹکل میں تیزرفتار منی ٹرک کی ایک بائک کے بعد دوسری بائک کو ٹکر؛ ایک ہلاک، دو شدید زخمی
بھٹکل 27/ستمبر (ایس او نیوز) ایک تیز رفتار بولیرو منی ٹرک ایک بائک کے بعد دوسری بائک کو تیزی رفتاری کے ساتھ ٹکر مارنے کے نتیجے میں پہلی بائک پر سوار ایک شخص موقع پر ہی ہلاک ہوگیا، جبکہ دوسری بائک پر سوار دو نوجوان شدید زخمی ہوگئے۔ دونوں زخمیوں کو بھٹکل کے پرائیویٹ اسپتال میں ابتدائی طبی امداد کے بعد منی پال شفٹ کیا گیا ہے۔ حادثہ بندر روڈ پر ڈونگرپلی کراس کے قریب بدھ کی شب قریب 8:30 بجے پیش آیا۔
بتایا گیا ہے کہ شرالی کی ایک دوائی کی فیکٹری میں کام کرنے والا ناگپا ایرپا نائک (45) اپنی ڈیوٹی انجام دینے کے بعد بائک پر اپنے گھر بندر کے قریب تالگوڈ جارہا تھا کہ بندرسے سرکل کی طرف جانے والی بولیرو منی ٹرک تیز رفتاری کے ساتھ اس کی بائک سے ٹکراگئی۔ عینی شاہدین نے بتایا کہ ناگپا کی بائک کو ٹکر مارنے کے بعد بولیرو اُس کی بائک کو کافی آگے تک گھسیٹ لی گئی، پھر بعد وہی ٹرک ڈونگرپلی کی طرف مُڑنے والی ایک دوسری بائک سے بھی ٹکراگئی۔ ناگپا نے موقع پر ہی دم توڑ دیا، البتہ دوسری بائک پر سوار مخدوم کالونی کے مروان ابن اویس جعفران (22) اور آسارکیری کے سعود ابن جعفر طاہرہ (22) شدید زخمی ہوگئے۔ دونوں کو فوری طور پر بھٹکل کے ویلفئیر اسپتال لے جایا گیا جہاں سے دونوں کو منی پال شفٹ کیا گیا ہے۔
مروان کے پیروں میں چوٹ لگی ہے، جبکہ سعود کو کمر اور سر کو چوٹ لگی ہے، البتہ دونوں خطرہ سے باہر ہیں۔
ناگپا نائک کی لاش کو بھٹکل سرکاری اسپتال لے جایا گیا ہے، جہاں پوسٹ مارٹم کے بعد اُس کی میت گھروالوں کے حوالے کی جائے گی۔
ناگپا نائک کو دو لڑکیاں اور ایک لڑکا ہے، اس کی بیوی ایک انگن واڑی میں ٹیچر ہے۔
بھٹکل ٹائون پولس تھانہ میں معاملہ درج کیا گیا ہےا ور پولس مزید چھان بین کررہی ہے۔