حوثیوں کے بارودی سرنگ دھماکے کے نتیجے میں ایک بچہ جاں بحق، دو زخمی
صنعاء،9نومبر(آئی این ایس انڈیا)جمعہ کے روز یمن کے دارالحکومت صنعا کے مشرق میں نھم ڈاریکٹوریٹ میں ایرانی حمایت یافتہ حوثی ملیشیا کی بچھائی گئی بارودی سرنگ پھٹنے سے ایک بچہ جاں بحق اور دو زخمی ہوگئے۔ایک مقامی ذرائع نے بتایا کہ نو سالہ مارش ربیع بارودی سرنگ کے دھماکے میں جاں بحق اور اس کی سات سالہ ھمام اور چھ سالہ بہن صنع اللہ ربیع یام کے مقام پر بکریاں چراتے ہوئے باردی سرنگ کے دھماکے میں زخمی ہوگئے۔مقامی میڈیا نے ذرائع کے حوالے سے بتایا ہے کہ دونوں زخمی بچوں کو علاج کے لیے مارب شہر کے جنرل اسپتال لایا گیا ہے۔یام کے علاقے میں یہ چھٹا واقعہ ہے جس میں ایک بچہ جاں بحق اور دو زخمی ہوگئے۔ حوثیوں نے اس علاقے میں ہزاروں بارودی سرنگوں اور دیسی ساختہ دھماکہ خیز آلات نصب کر رکھے ہیں۔حوثی ملیشیا نے دارالحکومت صنعا کی طرف سے یمنی فوج کی پیشرفت میں رکاوٹ پیدا کرنے کے لیے نھم کے علاقے میں بڑی تعداد میں بارودی سرنگیں نصب کررکھی ہیں۔