ಹೊಸದಿಲ್ಲಿ: ಚಾಲನಾ ಪರವಾನಿಗೆ ಹಾಗೂ ನೋಂದಣಿ ಪ್ರಮಾಣಪತ್ರಕ್ಕೆ ಸಂಬಂಧಿಸಿದ ನಿರ್ದಿಷ್ಟ ಸೇವೆಗಳು ಇನ್ನು ಮುಂದೆ ಸಂಪೂರ್ಣವಾಗಿ ಆನ್‌ಲೈನ್‌ನಲ್ಲಿ ಲಭ್ಯವಾಗಲಿವೆ ಎಂದು ರಸ್ತೆಸಾರಿಗೆ ಹಾಗೂ ಹೆದ್ದಾರಿ ಸಚಿವಾಲಯ ಬಿಡುಗಡೆ ಮಾಡಿದ ಸುತ್ತೋಲೆ ತಿಳಿಸಿದೆ.

ಅಂದರೆ ಇನ್ನು ಮುಂದೆ ಪ್ರಾದೇಶಿಕ ಸಾರಿಗೆ ಕಚೇರಿಗೆ ಭೇಟಿ ನೀಡದೆ ಆಧಾರ್‌ ದೃಢೀಕರಣದ ಮೂಲಕ ಸ್ವಯಂಪ್ರೇರಿತವಾಗಿ ಯಾರೂ ಕೂಡ ತಮ್ಮ ಚಾಲನಾ ಪರವಾನಿಗೆ ನವೀಕರಣಗೊಳಿಸಬಹುದು, ಆರ್‌ಸಿಯ ನಕಲು ಹಾಗೂ ಇಂತಹಇತರ ಸೇವೆಗಳನ್ನು ಪಡೆಯಬಹುದು. ಇದರ ಉದ್ದೇಶ ಪ್ರಕ್ರಿಯೆಯನ್ನು ಸುಗಮಗೊಳಿಸುವುದು ಹಾಗೂ ನಾಗರಿಕರ ಸಂಪರ್ಕವಿಲ್ಲದೆ, ಅವರಿಗೆ ತೊಂದರೆ ಮುಕ್ತ ಸೇವೆ ನೀಡುವುದು. ಇನ್ನು ಮುಂದೆ ಇಂತಹ 18 ಸಂರ್ಪ ರಹಿತ ಸೇವೆ ಲಭ್ಯವಾಗಲಿದೆ.

ಉತ್ತಮ ಆಡಳಿತದ ಖಾತರಿ ನೀಡಲು ಡಿಜಿಟಲ್ ವೇದಿಕೆಯನು ಬಳಸಲು ಇಲೆಕ್ಟ್ರಾನಿಕ್ಸ್ ಹಾಗೂ ಮಾಹಿತಿ ತಂತ್ರಜ್ಞಾನ ಸಚಿವಾಲಯದಿಂದ ಎಲ್ಲ ಅನುಮೋದನೆ ಪಡೆದುಕೊಳ್ಳಲಾಗಿದೆ ಎಂದು ರಸ್ತೆ ಸಾರಿಗೆ ಹಾಗೂ ಹೆದ್ದಾರಿ ಸಚಿವಾಲಯದ ಸುತ್ತೋಲೆ ಹೇಳಿದೆ. ಆನ್‌ಲೈನ್ ಸೇವೆ ಬಯಸುವವರು ಆಧಾರ್‌ ದೃಢೀಕರಣಕ್ಕೆ ಒಳಗಾಗಬೇಕು. ಈ ಆನ್‌ಲೈನ್ ಸೇವೆ ಬಗ್ಗೆ ಮಾಧ್ಯಮದ ಮೂಲಕ ವ್ಯಾಪಕ ಪ್ರಚಾರ ಮಾಡಲು ಎಲ್ಲ ವ್ಯವಸ್ಥೆ ಮಾಡಲಾಗುವುದು. ಅಲ್ಲದೆ, ಅನುಷ್ಠಾನಗೊಳಿಸಿದ ಏಜೆನ್ಸಿ ಮೂಲಕ ಸಂಪರ್ಕ ರಹಿತ ಸೇವೆ ಲಭ್ಯವಾಗಲು ಆಧಾರ್‌ನ ಅಗತ್ಯದ ಬಗ್ಗೆ ನಾಗರಿಕರಿಗೆ ಅರಿವು ಮೂಡಿಸಲು ವೈಯಕ್ತಿಕವಾಗಿ ನೋಟಿಸು ನೀಡಲಾಗುವುದು ಎಂದು ಸಚಿವಾಲಯ ತಿಳಿಸಿದೆ. ಈ ಆನ್ ಲೈನ್ ಸೇವೆ 2021 ಮಾರ್ಚ್ 3ರಿಂದ ಅನ್ವಯವಾಗಲಿದೆ. ಆಧಾರ್ ದೃಢೀಕರಣಗೊಳಿಸಿದ ಬಳಿಕ ಜನರಿಗೆ ಎಲ್ಲಾ 18 ಸಂಪರ್ಕ ರಹಿತ ಸೇವೆ ಲಭ್ಯವಾಗಲಿದೆ ಎಂದು ಸುತ್ತೋಲೆ ತಿಳಿಸಿದೆ.