ಬ್ಯಾಂಕಾಕ್: ಥಾಯ್ಲೆಂಡ್‌ನ ಶಿಶುವಿಹಾರದಲ್ಲಿ ಗುರುವಾರ ನಡೆದ ಗುಂಡಿನ ದಾಳಿಯಲ್ಲಿ 22 ಮಕ್ಕಳ ಸಹಿತ 34 ಮಂದಿ ಸಾವಿಗೀಡಾಗಿದ್ದಾರೆ. ದಾಳಿ ನಡೆಸಿದ ಮಾಜಿ ಪೊಲೀಸ್ ಅಧಿಕಾರಿ ಬಳಿಕ ತನ್ನ ಪತ್ನಿ ಮತ್ತು ಮಗುವನ್ನು ಹತ್ಯೆ ಮಾಡಿ ಸ್ವತಃ ಗುಂಡು ಹಾರಿಸಿಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾನೆ ಎಂದು ಪೊಲೀಸರು ಹೇಳಿದ್ದಾರೆ.

ಈಶಾನ್ಯ ಪ್ರಾಂತದ ನಾಂಗ್‌ಬುವಾ ಲ್ಯಾಂಪುವಿನ ಉತೈಸಾವನ್ ಪಟ್ಟಣದಲ್ಲಿರುವ ಶಿಶುವಿಹಾರದಲ್ಲಿ ಈ ದುರಂತ ಸಂಭವಿಸಿದೆ.

ಮಾದಕ ವಸ್ತು ಹೊಂದಿದ ಆರೋಪದಲ್ಲಿ ಪೊಲೀಸ್ ಇಲಾಖೆಯಿಂದ ವಜಾಗೊಂಡಿರುವ ವ್ಯಕ್ತಿ ಈ ದಾಳಿ ನಡೆಸಿದ್ದಾನೆ. ಮಧ್ಯಾಹ್ನ ಊಟದ ಸಮಯ ಶಿಶುವಿಹಾರಕ್ಕೆ ನುಗ್ಗಿದ ಆರೋಪಿ ಏಕಾಏಕಿ ಗುಂಡಿನ ದಾಳಿ ಆರಂಭಿಸಿದ್ದಾನೆ. ಆಗ ಶಿಶುವಿಹಾರದಲ್ಲಿ 30 ಮಕ್ಕಳಿದ್ದರು. ಹತರಾದವರಲ್ಲಿ 2 ವರ್ಷದ ಮಗುವೂ ಸೇರಿದೆ ಎಂದು ಜಿಲ್ಲಾ ಅಧಿಕಾರಿ ಜಿದಾಪ್ ಬೂನ್ನೋಮ್ ರನ್ನು ಉಲ್ಲೇಖಿಸಿ ರಾಸ್ಟರ್ಸ್ ವರದಿ ಮಾಡಿದೆ.

ದಾಳಿ ನಡೆಸಿದ ಬಂದೂಕುಧಾರಿಯನ್ನು ಕಳೆದ ವರ್ಷ ಪೊಲೀಸ್ ಪಡೆಯಿಂದ ವಜಾಗೊಳಿಸಲಾಗಿತ್ತು. ಶಿಶು ವಿಹಾರಕ್ಕೆ ನುಗ್ಗಿದ ಆತ ಮೊದಲು 8 ತಿಂಗಳ ಗರ್ಭಿಣಿ ಶಿಕ್ಷಕಿಯ ಸಹಿತ 5 ಸಿಬ್ಬಂದಿಗೆ ಗುಂಡು ಹಾರಿಸಿ ದ್ದಾನೆ ಎಂದು ನಾಕ್ಲಾಂಗ್ ಪೊಲೀಸ್ ಠಾಣೆಯ ಸುಪರಿಂ ಟೆಂಡೆಂಟ್ ಛಕ್ರಪಾತ್ ವಿಚಿತ್ ವೈದ್ಯ ಹೇಳಿದ್ದಾರೆ. ಆರಂಭ ದಲ್ಲಿ ಇದು ಪಟಾಕಿ ಸಿಡಿಸಿದ ಸದ್ದು ಎಂದು ಭಾವಿಸಿದ್ದೆವು ಎಂದು ಸ್ಥಳೀಯರು ಹೇಳಿದ್ದಾರೆ.

ಬಂದೂಕುಧಾರಿ ಮಾದಕ ವಸ್ತುವಿನ ನಶೆಯಲ್ಲಿದ್ದ ಎಂಬ ಶಂಕೆಯಿದೆ. ಇದೊಂದು ಆಘಾತಕಾರಿ ದುರಂತ ಎಂದಿರುವ ಥಾಯ್ಲೆಂಡ್ ಪ್ರಧಾನಿ ಪ್ರಯೂಥ್ ಚಾನ್-ಒಚ ಸಂತ್ರಸ್ತ ಕುಟುಂಬಗಳಿಗೆ ಸಾಂತ್ವನ ಹೇಳಿದ್ದಾರೆ. ಗಾಯಾಳುಗಳಿಗೆ ತುರ್ತು ಚಿಕಿತ್ಸೆ ಒದಗಿಸುವಂತೆ ಅವರು ಎಲ್ಲಾ ಏಜೆನ್ಸಿಗಳಿಗೆ ಆದೇಶಿಸಿದ್ದಾರೆ.