ಭಟ್ಕಳ : ತಾಲ್ಲೂಕಿನ ಮಾರುಕೇರಿಯ ಕಿತ್ರೆಯಲ್ಲಿ ಶುಕ್ರವಾರ ಕೋವಿಡ್ ಸೋಂಕಿನಿಂದಾಗಿ ಮೃತಪಟ್ಟ ವ್ಯಕ್ತಿಯ ಅಂತ್ಯ ಸಂಸ್ಕಾರವನ್ನು  ತಾಲ್ಲೂಕು ಆಡಳಿತವೇ ನೆರವೇರಿಸಿತು.  
ಶುಕ್ರವಾರ ಬೆಳಗಿನ ಜಾವ ಮಾರುಕೇರಿ ಗ್ರಾಮ ಪಂಚಾಯತ್ ವ್ಯಾಪ್ತಿಯ  ಕಿತ್ರೆಯಲ್ಲಿ ಕೋವಿಡ್ ಸೋಂಕಿತರೊಬ್ಬರು (60) ಮನೆಯಲ್ಲೇ ತೀವ್ರತರದ ಉಸಿರಾಟ ಸಮಸ್ಯೆಯಿಂದ ಕೊನೆಯುಸಿರೆಳೆದಿದ್ದರು. ಇವರು ಕುಂದಾಪುರ ಸರಕಾರಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆದು ಗುರುವಾರ ಸಂಜೆಯಷ್ಟೇ ಮನೆಗೆ ಬಂದಿದ್ದರು. ಇವರ ಅಂತ್ಯ ಸಂಸ್ಕಾರವನ್ನು ನಡೆಸಲು ಕೋವಿಡ್ ಭಯದಿಂದ ಅಂತ್ಯಸಂಸ್ಕಾರಕ್ಕೆ ಯಾರು ಮುಂದೆ ಬಂದಿರಲಿಲ್ಲ.ಮಕ್ಕಳು ಚಿಕ್ಕವರಿರುವ ಕಾರಣ ಮನೆಯವರು ಶವಸಂಸ್ಕಾರಕ್ಕಾಗಿ ತಾಲೂಕಾಡಳಿತದ ಸಹಾಯ ಯಾಚಿಸಿದ್ದರು.ತಾಲ್ಲೂಕು ಆಡಳಿತವೇ ನಡೆಸಲು ಮುಂದಾಯಿತು. ಸ್ಥಳಕ್ಕೆ ತಹಸೀಲ್ದಾರ ರವಿಚಂದ್ರ, ಸಿಪಿಐ ದಿವಾಕರ್, ಜಾಲಿ ಪಟ್ಟಣ ಪಂಚಾಯತಿಯ ಮುಖ್ಯಾಧಿಕಾರಿ ಅಜಯ ಭಂಡಾರಕರ್, ಪಿಡಿಓ ಮಹೇಶ ನಾಯ್ಕ, ವೈದ್ಯರು  ಮತ್ತಿತರ ಅಧಿಕಾರಿಗಳ ತಂಡ  ಭೇಟಿ ನೀಡಿ ಮೃತನ ಅಂತ್ಯಸಂಸ್ಕಾರಕ್ಕೆ ಬೇಕಾಗುವ ಎಲ್ಲಾ ಏರ್ಪಾಟು ಮಾಡಿದರ. ಶುಕ್ರವಾರ ಮಧ್ಯಾಹ್ನ ಕೋವಿಡ್ ಮುಂಜಾಗ್ರತಾಕ್ರಮದೊಂದಿಗೆ  ಮೃತನ ಪುತ್ರನ ಜೊತೆಗೆ ಪಿಪಿಇ ಕಿಟ್ ಧರಿಸಿದ ಜಾಲಿ ಪಟ್ಟಣ ಪಂಚಾಯತ್‍ನ ಪೌರಕಾರ್ಮಿಕರಾದ ಕೃಷ್ಣಾ ಅಣ್ಣಾಮಲೈ, ಶಿವಬಸವ ಕೊರಗಾರ, ರಾಮಾ ಗೊಂಡ, ನಾಗರಾಜ ಮಾಣಿಕ ಅವರು ಮೃತದೇಹವನ್ನು ಹೊತ್ತೊಯ್ದು ಅಂತ್ಯಸಂಸ್ಕಾರಕ್ಕೆ ನೆರವಾದರು. ಮಳೆಯಿಂದಾಗಿ ಅಂತ್ಯಸಂಸ್ಕಾರ ಸ್ವಲ್ಪ ವಿಳಂಬವಾದರೂ ತಹಸೀಲ್ದಾರ, ಸಿಪಿಐ ಸೇರಿದಂತೆ ಅಧಿಕಾರಿಗಳು, ಸಿಬ್ಬಂದಿಗಳು, ಮಾರುಕೇರಿ ಗ್ರಾ,ಪಂ. ಸದಸ್ಯ ಎಂ ಡಿ ನಾಯ್ಕ, ಸಾಲಗಾರರ ಸಂಘದ ಅಧ್ಯಕ್ಷ ಗಣಪತಿ ನಾಯ್ಕ ಜಾಲಿ, ಹೊನ್ನಾವರದ ಶಂಕರ ಹೆಗಡೆ ಮತ್ತಿತರರು ಅಂತ್ಯ ಸಂಸ್ಕಾರ ಪೂರ್ಣಗೊಳ್ಳುವ ವರೆಗೂ ಇದ್ದರು. ತಾಲ್ಲೂಕು ಆಡಳಿತದ ಕಾರ್ಯ ಜನಮೆಚ್ಚುಗೆಗೆ ಮೆಚ್ಚುಗೆಗೆ ಪಾತ್ರವಾಗಿದೆ. ಶವಸಂಸ್ಕಾರ ಮಾಡಿದ ಜಾಲಿ ಪಟ್ಟಣ ಪಂಚಾಯತ್ ಮುಖ್ಯಾಧಿಕಾರಿ ಅಜಯರವರು ಮಾತನಾಡಿ ಹಿಂದೂಗಳ ಸಂಪ್ರದಾಯದಂತೆ ನಮಗೆ ಶವಸಂಸ್ಕಾರ ಮಾಡುವುದು ಕಷ್ಟವಾಗುತ್ತದೆ. ಚಟ್ಟ ಕಟ್ಟುವುದು. ಮಡಿಕೆ ಓಡೆಯುವುದು ಇನ್ನೀತರ ಸಂಪ್ರದಾಯ ಪಾಲಿಸಿವುದು ನಮಗೆ ಬರದಿದ್ದರೂ ತಿಳಿದ ಮಟ್ಟಿಗೆ ಮಾಡಿ ಮುಗಿಸಿದ್ದೇವೆ.ಮುಂದಿನ ದಿನಗಳಲ್ಲಿ ಸಂಘ ಸಂಸ್ಥೆಗಳು ಸ್ವಯಂಪ್ರೇರಣೆಯಿಂದ ಮುಂದೆ ಬಂದು ಇಂತಹ ಕೆಲಸಗಳನ್ನು ಮಾಡಿದರೆ ಉತ್ತಮ ಎಂದು ತಿಳಿಸಿದರು.