ಹೊಸದಿಲ್ಲಿ: ತೈಲ ಬೆಲೆಗಳು ಸತತ ಐದನೇ ದಿನವೂ ಏರಿಕೆಯಾಗಿದ್ದು, ಶನಿವಾರ ಪೆಟ್ರೋಲ್ ದರದಲ್ಲಿ ಲೀಟರ್‌ಗೆ 30 ಪೈಸೆ, ಡೀಸೆಲ್ ದರದಲ್ಲಿ 36 ಪೈಸೆ ಹೆಚ್ಚಳವಾಗಿದೆ. ಇದರಿಂದಾಗಿ ರಾಜಧಾನಿ 23 ಹೊಸದಿಲ್ಲಿಯಲ್ಲಿ ಪೆಟ್ರೋಲ್ ಬೆಲೆ ಲೀಟರ್‌ಗೆ 88.44 ರೂ. ಹಾಗೂ ಡೀಸೆಲ್ ಬೆಲೆ 78.74 ರೂ. ಆಗಿದೆ. ಡೀಸೆಲ್ ಬೆಲೆಯಲ್ಲಿನ ಹೆಚ್ಚಳ

ಈ ವರ್ಷದ ಗರಿಷ್ಠ ಏರಿಕೆಯಾಗಿದೆ. ದೇಶದ ವಾಣಿಜ್ಯ ರಾಜಧಾನಿ ಮುಂಬೈಯಲ್ಲಿ ಪೆಟ್ರೋಲ್ ದರ ಲೀಟರ್‌ಗೆ 95 ರೂ. ಆಗಿದ್ದು, ಇದು ದೇಶದಲ್ಲೇ ಅಧಿಕವಾಗಿದೆ. ಡೀಸೆಲ್ ಬೆಲೆ ಕೂಡಾ ಮುಂಬೈಯಲ್ಲಿ ಲೀಟರ್‌ಗೆ 90 ರೂ. ಸನಿಹಕ್ಕೆ ಬಂದಿದೆ. ಇತರ ಎಲ್ಲಾ ಮೆಟ್ರೋ ನಗರಗಳಲ್ಲಿಯೂ ಪೆಟ್ರೋಲ್ ದರವು ಲೀಟರ್‌ಗೆ 90 ರೂ. ಗಡಿಯಲ್ಲಿದೆ ಅಥವಾ ಅದಕ್ಕಿಂತ ತುಸು ಹೆಚ್ಚಿದೆ. ದಿಲ್ಲಿ ಹೊರತುಪಡಿಸಿ ಉಳಿದ ಮೆಟ್ರೋ ನಗರಗಳಲ್ಲಿ ಡೀಸೆಲ್ ದರವು 80 ರೂ. ಗಡಿಯನ್ನು ದಾಟಿದೆ. ಬ್ರೆಂಟ್ ಕಚ್ಚಾ ತೈಲದ ಬೆಲೆ ಒಂದೇ ದಿನದಲ್ಲಿ ಬ್ಯಾರೆಲ್ ಗೆ ಶೇ.2ರಷ್ಟು ಏರಿಕೆಯಾಗಿರುವುದರಿಂದ ಜಾಗತಿಕ ಮಟ್ಟದಲ್ಲಿ ತೈಲ ದರಗಳಲ್ಲಿ ಹೆಚ್ಚಳವಾಗಲು ಕಾರಣವೆನ್ನಲಾಗಿದೆ. ಆದರೆ, ಕೊರೋನ ವೈರಸ್ ಹಾವಳಿ ಮತ್ತೆ ಉಲ್ಬಣಿಸಿರುವ ಹಿನ್ನೆಲೆಯಲ್ಲಿ ಜಗತ್ತಿನ ವಿವಿಧೆಡೆ ಲಾಕ್‌ಡೌನ್‌ ಹೇರಲಾಗಿರುವುದರಿಂದ ತೈಲ ಬೆಲೆಗಳು ಶೀಘ್ರದಲ್ಲೇ ಇಳಿಮುಖವಾಗುವ ನಿರೀಕ್ಷೆಯಿದೆಯೆಂದು ತಜ್ಞರು ಹೇಳಿದ್ದಾರೆ.