ಮುಂಬೈಯಲ್ಲಿ ಭಾರೀ ಮಳೆ
ಮುಂಬೈ: ಮುಂಬೈ ಮಂಗಳವಾರ ಬೆಳಗ್ಗೆ ಭಾರೀ ಮಳೆಗೆ ಸಾಕ್ಷಿಯಾಯಿತು. ಸೋಮವಾರ ರಾತ್ರಿಯಿಂದ ಎಡೆಬಿಡದೆ ಸುರಿಯುತ್ತಿರುವ ಭಾರೀ ಮಳೆಗೆ ನಗರ ಪ್ರದೇಶದ ಹಲವು ಭಾಗಗಳು ಜಲಾವೃತವಾಗಿವೆ. ಇದರಿಂದ ನಗರ ಜೀವನ, ಉಪವಲಯದ ರೈಲ್ವೆ ಸಂಚಾರ ಹಾಗೂ ರಸ್ತೆ ಸಂಚಾರ ವ್ಯವಸ್ಥೆ ಅಸ್ತವ್ಯಸ್ತವಾಗಿದೆ.
ಸೋಮವಾರ ಸಂಜೆ 4.30ರ ಹೊತ್ತಿಗೆ ಭಾರೀ ನೆರೆ ಉಂಟಾಗಿತ್ತು. ಮಳೆ ನಿರಂತರ ಮುಂದುವರಿದರೆ, ಪರಿಸ್ಥಿತಿ ಇನ್ನಷ್ಟು ಹದಗೆಡಲಿದೆ. ಸಿಯೋನ್ ಹಾಗೂ ಅಂಧೇರಿ ಸಬ್ ವೇ ಜಲಾವೃತವಾಗಿರುವ ಬಗ್ಗೆ ಮಾತ್ರ ಎರಡು ದೂರುಗಳನ್ನು ಸ್ವೀಕರಿಸಲಾಗಿದೆ ಎಂದು ಬೃಹನ್ಮುಂಬಯಿ ಪುರಸಭೆ ನಿಗಮದ ಅಧಿಕಾರಿಗಳು ತಿಳಿಸಿದ್ದಾರೆ.
ಸಿಯೋನ್, ಮಾತುಂಗ, ದಾದರ್ನ ವಿವಿಧ ಭಾಗ, ಹಿಂಡ್ಮಾತಾ, ವಾಡಾಲಾ, ಘಾಟ್ಕೋಪರ್, ಅಂಧೇರಿ ಹಾಗೂ ಮುಲುಂದ್ ನಂತಹ ಪ್ರದೇಶಗಳು ಜಲಾವೃತವಾಗಿವೆ ಎಂದು ನಾಗರಿಕರು ದೂರಿದ್ದಾರೆ. ಹಲವರು ದೂರು ದಾಖಲಿಸಲು ಹಾಗೂ ಜಲಾವೃತ ಪ್ರದೇಶಗಳ ಮಾಹಿತಿ ನೀಡಲು ಟ್ವಿಟ್ಟರ್ ಬಳಸುತ್ತಿದ್ದಾರೆ. ನಗರದಲ್ಲಿ ಕಳೆದ ನಾಲ್ಕು ದಿನಗಳಿಂದ ಭಾರೀ ಮಳೆ ಸುರಿಯುತ್ತಿದೆ. ಅವ್ಯಾಹತ ಮಳೆಗೆ ಕಳೆದ ಮೂರು ದಿನಗಳಿಂದ ಹಲವು ಪ್ರದೇಶಗಳು ಜಲಾವೃತವಾಗಿವೆ. ಇದರಿಂದ ಸಂಚಾರ ವ್ಯವಸ್ಥೆ ಅಸ್ತವ್ಯಸ್ತವಾಗಿದೆ.