ಬೆಂಗಳೂರು: ರಾಜ್ಯ ಸರ್ಕಾರ ಕೊವಿಡ್- 19 ಪರೀಕ್ಷೆಗಳನ್ನು ಮತ್ತಷ್ಟು ಹೆಚ್ಚಿಸುವುದಕ್ಕಾಗಿ ರೆಡ್‍ಝೋನ್ ಜಿಲ್ಲೆಗಳಿಗೆ 66 ಸಾವಿರ ಟೆಸ್ಟ್ ಕಿಟ್ ಹಾಗೂ ಇದುವರೆಗೂ ಯಾವುದೇ ಪಾಸಿಟಿವ್ ಪ್ರಕರಣಗಳು ವರದಿಯಾಗದ ಗ್ರೀನ್‍ಝೋನ್ ಜಿಲ್ಲೆಗಳಿಗೆ 34 ಸಾವಿರ ಟೆಸ್ಟ್ ಕಿಟ್‍ಗಳನ್ನು ಹಂಚಿಕೆ ಮಾಡಿದೆ.

ರಾಜ್ಯ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆ ಈ ಸಂಬಂಧ ಇಂದು ಅಧಿಸೂಚನೆ ಹೊರಡಿಸಿದ್ದು, ಒಟ್ಟು 30 ಜಿಲ್ಲೆಗಳಿಗಾಗಿ 1 ಲಕ್ಷ ಟೆಸ್ಟ್ ಕಿಟ್‍ಗಳನ್ನು ಖರೀದಿಸಿ ಹಂಚಿಕೆ ಮಾಡಿದೆ. ಈ ಮಧ್ಯೆ, ಭಾರತೀಯ ವೈದ್ಯಕೀಯ ಸಂಶೋಧನಾ ಮಂಡಳಿ (ಐಸಿಎಂಆರ್)ಯು ರಾಜ್ಯದಲ್ಲಿ ಹೊಸದಾಗಿ 16 ಕೋವಿಡ್- 19 ಪ್ರಯೋಗಾಲಯಗಳನ್ನು (11 ಸರ್ಕಾರಿ ಹಾಗೂ 5 ಖಾಸಗಿ ಪ್ರಯೋಗಾಲಯ) ಆರಂಭಿಸಲು ಅನುಮತಿ ನೀಡಿದೆ.
ಖಾಸಗಿ ಪ್ರಯೋಗಾಲಯಗಳಲ್ಲಿ ಕೋವಿಡ್- 19 ಪರೀಕ್ಷೆಗೆ 2,250 ರೂಪಾಯಿ ದರ ನಿಗದಿ ಮಾಡಿ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆ ಆದೇಶ ಹೊರಡಿಸಿದೆ.
***